"Türkiyənin Ermənistanın başsağlığını rədd etməsi üçün elə bir ciddi əsas yoxdur"
“Başsağlığı vermək dövlətlərarası münasibətlərdə qəbul olunmuş protokol qaydasıdır. Nəzərə alsaq ki, Ermənistanla Türkiyə arasında gərgin münasibətlər davam etməkdədir və 44 günlük müharibədən sonra hər iki tərəf münasibətlərin normallaşması istiqamətində müəyyən cəhdlər edir. Ələlxüsus, qardaş Türkiyə tərəfindən Ermənistana tarixi biri şans verildi. Çünki Ermənistanın yerləşdiyi coğrafi şərait elədir ki, Azərbaycan və Türkiyə ilə normal münasibətlər qurmadan heç bir inkişafdan, perspektivdən söhbət gedə bilməz”.
Bu sözləri Pravda.az-a Milli Məclisin deputatı Nəsib Məhəməliyev Ermənistanın Türkiyəyə terrorla əlaqədar başsağlığı verməsi barədə danışarkən deyib.
Deputat bildirib ki, səmimiyyətdən asılı olmayaraq, Ermənistan Türkiyəyə başsağlığı verməli idi: “Bu, bir növ barışığa yönəlmiş addımdır. Lakin müşahidələr göstərir ki, beynəlxalq münasibətlər sistemində hər şey göründüyü kimi deyil. Bir çox ölkələr üzdə başqa, arxada başqa siyasət həyata keçirirlər. Ermənistan da o dövlətlərdəndir. Bir dövlətin ki Konstitusiya səviyyəsində qonşu ölkələrə qarşı ərazi iddiası var, bir ölkə ki siyasi partiyalar vasitəsilə bilavasitə terror təşkilatları ilə əlaqələr qurur, onlarla iş birliyi mövcuddur, burada hər hansı səmiyyətdən söhbət gedə bilməz. Ermənistan dövləti səmimi olsaydı, 10 noyabr və ondan sonrakı üçtərəfli razılaşmaları icra edərdi, gələcəkdə baş verə biləcək terror hadisələrinin qarşısını alardı. Bunu etmirsə, deməli, Ermənistan səmimi deyil. Terror aktı istənilən halda pislənilməlidir. Bu, insanlıq, mülki şəxslər əleyhinə törədilmiş ağır cinayətdir. Təbii ki, Ermənistanın dövlət siyasətinin mahiyyəti, onların uzun illər ərzində terrora dəstək verdikləri, ASALA və digər PKK, YPG, PYD kimi terror təşkilatları ilə sıx əlaqəsi olduğu, erməni terror təşkilatlarının da dünyanın müxtəlif ölkələrində terror aktları törətdikləri hər kəsə məlumdur. Təsadüfi deyil ki, ABŞ Konqresi tərəfindən də ASALA terror təşkilatı kimi qəbul olunub. Bir çox ölkələr bunu bilirlər”.
Deputat “Türkiyə ABŞ-ın başsağlığını rədd etdi, Ermənistanınkını da rədd edə bilməzdimi?” sualına isə belə cavab verib: “Xeyr. Ermənistanın başsağlığını rədd etmək üçün elə bir ciddi əsas yoxdur. Çünki rəsmi olaraq terrorçu Suriya vətəndaşıdır, Suriyada YPG, PYD terror təşkilatları düşərgələrində hazırlanmış kəşfiyyatçıdır. Ona görə də Türkiyənin indiki halda Ermənistanın başsağlığını rədd etməsi gələcəkdə nəzərdə tutulmuş barışıq missiyasına, sülh prosesinin nizamlanmasına ciddi zərbə ola bilər. Türkiyənin hüquq-mühafizə orqanları kifayət qədər peşəkardır, tək Türkiyə ərazisində yox, dünyanın bir çox coğrafiyalarında yetərincə peşəkarcasına qurulmuş şəbəkəyə malikdir. Onların informasiya mənbələri kifayət qədərdir. Faktlar olmadan hər hansı addım atmazlar, çıxış etməzlər”.