"Mən "tələbə inşaat dəstələri" demişəm, oxuyub görürəm ki, guya tələbələrin mina təmizləmələrini istəmişəm".
Bir neçə gün əvvəl Milli Məclisin deputatı Aqil Abbasın Parlamentdə çıxışı zamanı tələbələrin işləməsi haqqında bildirdiyi fikir müzakirələrə səbəb olub.
Məsələ ilə bağlı Sonxeber.az saytı deputat Aqil Abbasın fikrini öyrənmək üçün onun özü ilə əlaqə saxlayıb. O, əslində söhbətin təqdim edildiyi tərzdə olmadığını və konteksdən çıxarıldığını bildirib: "Saytda yazılanlara deyil, mənim parlamentdə çıxışıma baxın, görün, nəyi necə demişəm. Bəziləri xəbəri özlərinə sərf etdiyi kimi yazırlar: istədikləri yeri kəsir, montaj edir, sözün əvvəlini paylaşır, ardını yazmır və göstərmirlər. Siz özünüz diqqətlə izləyin, görün, nəyi necə demişəm.
Mən "tələbə inşaat dəstələri" demişəm, oxuyub görürəm ki, guya tələbələrin mina təmizləmələrini istəmişəm. 5 il bundan əvvəl olan çıxışlarımı tapıb, oradan nəyisə götürüb, kəsib paylaşırlar.
Bu kimdirsə, belə videoları təkrar-təkrar paylaşır ki, rəy çox gəlsin, söyüşlər yazılsın.
Sözüm isə o idi ki, tələbələr iki ay bekar qalır. Həmin o tələbə gedib Qarabağı tikə bilər və 1000AZN, bəlkə də daha çox maaş ala bilər. Bu da onun həm özünə, həm də ailəsinə kömək olar.
Mən deyirəm ki, 250-300AZN maaş azdır. Şirkətlərdə azı 500-600 AZN maaş alacaqlar. Onlar adətən tələbə inşaat dəstəsində muzdlu sayılır və gördükləri işin müqabilində maaş alırlar. Mən bunları demişəm.
Tələbə inşaat dəstələri də SSRİ vaxtından qalıb. Oxumaq da o dövrdən qalıb, o zaman bağca və məktəbləri bağlayaq? Bunu Azərbaycan kəşf eləmişdi. Bizim uşaqlar SSRİ vaxtı tikintidə işləyirdilər. İndi də onlar azı iki ay işci qüvvəsi kimi Qarabağda könüllü işləyə və bununla ailələrinə dəstək ola bilərlər.
Axı biz "Qarabağa qayıdış" deyirik, oraları tez tikib abadlaşdırmaq istəyirik, doğma torpaqlarımıza getməyi düşünürik.
Mən özüm də 3-cü kursa keçən zaman inşaatda könüllü işləmişəm.
Amma indi yayda kitabxanalarda tələbə görmək mümkündürmü? Yox. Çoxu evdə işsiz oturur. Niyə gedib işləməsinlər?
Ağdam "yüz minlik" şəhər olacaq. İşləsələr, hətta oradan ev də ala bilərlər. Ağdamda, Füzulidə, Zəngilanda, digər şəhərlərimizdə də gələcəkdə yaşayıb, ailə qura bilərlər.
Öz torpaqlarımızdır. Orada zamanında özləri üçün şərait qursunlar. Lap elə qarabağlılarımız olsun.
Bəziləri "özü, oğulları gedib işləsinlər" kimi şərhlər yazırlar. Oğlum da gedib işləyəcək. Düzdür, övladlarım tələbə deyil, böyükdürlər. Amma zamanı gələndə gedib işləyəcəklər. Niyə işləmirlər ki? Özüm də icazə alıb, evimi orada tikəcəyəm. Övladlarımla, qohumlarımla gedib öz işimi özüm görəcəyəm.
Digər tərəfdən, "mina təmizləmək", "minaya düşəcəklər" kimi ifadələrdən istifadə edirlər. Əvvəla, mina təmizləməyə hətta hərbçilərimizə icazə verilmir. Xüsusi minatəmizləyən qurum (ANAMA) və FHN işçiləri bu işlə məşğuldurlar. Tələbəyə mina təmizlətəcəklər? Elə deyil!
Özüm Ağdamda şəhəri gəzmişəm, oxuduğum məktəbə kimi getmişəm. Oralarda mina yoxdur. Mina olsa tikinti aparan ustalar, fəhlələr minaya düşməzdilərmi?"