"Azərbaycan Avropa İttifaqına üzvlük barədə müraciət etsə belə onu ittifaqda heç kim gözləmir".
“Real danışmaq lazımdır: Azərbaycan Avropa İttifaqına üzvlük barədə müraciət etsə belə onu ittifaqda heç kim gözləmir. Azərbaycan Avropa İttifaqına onların enerji təhlükəsizliyi və maraqlarına görə daha çox lazımdır. Eyni zamanda, strateji tərəfdaşlıq Azərbaycana da lazımdır. Ona görə də dövlətimiz Avropa İttifaqı ilə müəyyən mənada məsafəli və milli maraqlarımıza cavab verən siyasət aparır. Azərbaycan İttifaqa üzv olan 9 dövlətlə strateji tərəfdaşlıq haqqında saziş imzalayıb. Bu, artan templə davam edir və Rusiya-Qərb qarşıdurması fonunda ölkəmizin Avropa İttifaqı üçün strateji əhəmiyyəti daha da artır".
Bunu Pravda.az-a açıqlamasında Milli Məclisin deputatı Nəsib Məhəməliyev deyib.
N.Məhəməliyev bildirib ki, Avropa İttifaqının Azərbaycanı üzv kimi həvəslə gözləmədiyi bir vaxtda ittifaqa üzvlük haqqında düşünməyə ehtiyac da yoxdur: "Azərbaycan, ilk növbədə, dövlət maraqlarından çıxış etməlidir. Bu gün Ukraynada baş verən hadisələri Şərq və Qərbin toqquşması kimi qiymətləndirmək lazımdır. Ümumiyyətlə isə, Ukraynadan sonra Moldova və Gürcüstanın da Avropa İttifaqına üzvlük barədə ərizəyə imza atmalarını qlobal düşüncənin məhsulu hesab edirəm. Bunu Rusiya-Ukrayna münaqişəsi zəminində yaranmış vəziyyətlə əlaqələndirirəm. Nəzərə almaq lazımdır ki, Qərb dövlətləri, adətən, verdiyi qərarlarda beynəlxalq hüquqa və yaxud sosial ədalət prinsiplərinə əsaslanmır. Biz bunun dəfələrlə şahidi olmuşuq. Misal üçün, Avropa İttifaqı Türkiyə kimi demokratik, iqtisadi, sosial və hərbi baxımdan kifayət qədər inkişaf etmiş bir dövlətin üzvlüyünü uzun illər qəbul etməyib. Bu, əlbəttə ki, ikili standartların təzahürüdür. Məhz belə vəziyyətdə, Prezident İlham Əliyevin apardığı siyasət ən optimaldır, Azərbaycanın həm milli, həm də dövlət maraqlarına tam uygundur. Ölkəmizin yerləşdiyi regionun mürəkkəbliyini, geosiyasi proseslərdə yerini və digər amilləri dəqiq ölçüb-biçməklə siyasətini həyata keçirir. Əgər belə olmasaydı, Azərbaycan ərazi bütövlüyünə təhdid halları ilə dəfələrlə rastlaşa və torpaqlarını itirə bilərdi. 1980-ci illərin sonlarından etibarən süni şəkildə yaradılmış "Dağlıq Qarabağ problemi", müxtəlif xarici qüvvələrin maraqları, baş vermiş xoşagəlməz hadisələrə xronoloji ardıcıllıqla baxsaq, məsələləri təhlil etsək, görərik ki, ölkəmizə hər addımda zərbə vurmaq istəyənlər, Azərbaycanın inkişafını həzm edə bilməyənlər çoxdur. Ona görə də tam əminliklə deyə bilərəm ki, Prezident İlham Əliyev tam doğru və dəqiq xarici siyasət həyata keçirir".