“Xalqımız kimin kim olduğunu yaxşı bilir”
“Feministlər əlamətdar günlər ərəfəsində belə aksiyalar keçirməyi artıq adət ediblər. Azərbaycan xalqının milli-mənəvi dəyərləri, etik normaları, ağsaqqal, ağbirçək yeri var. Bu qadınlar qeyri-etik şüarlarla küçələrə çıxırlarsa, əxlaq normalarına uyğun olmayan şüarlar səsləndirirlərsə, bu, cəmiyyət arasında geniş yayılırsa, deməli, onların istəyi puçdur, yersizdir. Çünki Azərbaycan xalqı daim öz kökü üstündə möhkəmlənməli, öz kökünə, mədəniyyətinə, əxlaqına, tarixinə, keçmişinə əsaslanmalıdır. Bu əsaslanmalar olmasaydı, biz 44 günlük müharibədə belə əzəmətli qələbə qazana bilməzdik. Gənclərimiz əxlaqi-mənəvi cəhətdən möhkəm olmasaydılar, milli-mənəvi dəyərlərə arxalanmasaydılar, ermənilər kimi fərarilərə çevrilər, Vətəni, torpağı qoyub qaçar, ana-bacılarının dadına çatmazdılar, torpaq uğrunda canlarını fəda etməzdilər. Buna görə də hər şey mədəniyyətə, mənəviyyata, əxlaqa söykənməlidir. Biz bir xalq kimi öz əxlaqımız, mənəviyyatımız, dəyərlərimiz, mədəniyyətimizlə yüksəkdəyik”.
Bu sözləri Pravda.az-a Milli Məclisin deputatı Tahir Rzayev 8 Martda Bakının mərkəzində bir qrup feministin qadın hüquqları ilə bağlı aksiya keçirməsi barədə danışarkən deyib.
Deputat vurğulayıb ki, Prezident İlham Əliyev də daim milli-mənəvi dəyərləri yüksək tutmağı, onu ucaltmağı, qorumağı tövsiyə edir: “Dahilərimiz, ulu öndərimiz Heydər Əliyev də daimi olaraq öz kökümüzə söykənməyi bizə təbliğ edirdi. Çox təəssüf edirəm ki, indi bir çox yad meyillərə uyan qadınlarımız var. Onlar haradansa qaynaqlanır, müəyyən pullar, vəsait hesabına kütləvi şəkildə bu cür küçələrə çıxmağı, qeyri-etik normaları pozmağı, Azərbaycan qadınının adına, şəxsiyyətinə nüfuzuna yaraşmayan şüarlar səsləndirməyi özlərinə rəva bilirlər. Bu, düzgün deyil. Bununla cəmiyyətdə heç bir hörmət qazana bilməzlər. Bunlar kiçik quruplardır və xarici ölkələrdən, yerli müxalifətdən dəstək alırlar. Çox təəssüf ki, qadınlarımızın öz bayramlarını şən, firəvan keçirdikləri günlərdə belə bir kiçik qrup ortalığa hay-həşir salmağa, qanqaraçılıq salmağa çalışır. Bu yoldan çəkinməlidirlər. Bu gün Azərbaycan qadını müdrik, dünya görüşlü, ayıqdır. Xalqımız kimin kim olduğunu yaxşı bilir. Belə cəhdlər əbəsdir”.