Siyasət 11 Mart 2024, 16:15 | Baxış sayı: 117
""Toplum TV” işi ilə bağlı hüquq-mühafizə orqanları tərəfindən bir neçə nəfərin saxlanılması Azərbaycanın daxili işidir"

“Hüquq-mühafizə orqanları tərəfindən “Toplum TV”nin ofisində axtarışlar aparılması və ilkin olaraq bir neçə nəfərin saxlanılması Azərbaycanın daxili işidir. Bu, kimlərisə narahat edirsə, elə bunun özünün üzərində düşünməyə dəyər. ABŞ-nin siyasi dairələri, konkret Dövlət Departamenti tərəfindən Azərbaycanın indiyə qədər başına gətirilən oyunlar, insanlarına qarşı terrorçu əməllər, ərazilərinin işğal olunması barədə o dəqiqə hansısa bəyanat verilməsinin şahidi olmamışıq. Çox maraqlıdır ki, ABŞ-nin özündə hər gün minlərlə cinayət hadisələri baş verir. Halbuki Amerikanın kiçik yaşlı uşaqlardan başlayaraq, orta məktəblərdə, liseylərdə, universitetlərdə, adi küçələrdə qara dərili insanların təzyiqlərə məruz qalmaları, hətta öldürülmələri, böyük ştatları cinayət yuvasına çevirən qruplaşmaların zərərsizləşdirilməsi ilə bağlı öz problemləri mövcuddur. Bu və buna bənzər dövlətlər digər ölkələrin daxili işlərinə qarışmağı özlərinə bir növ peşə seçiblər. Belə mənasız bəyanatlar verməklə bir daha göstərirlər ki, müstəqil siyasət həyata keçirən ölkələrdə onlar cəmiyyətin normal inkişafına, stabil həyatın bərqərar olmasında maraqlı deyillər”.

 

Bu sözləri açıqlamasında Milli Məclisin Hüquq siyasəti və dövlət quruculuğu komitəsinin üzvü Vüqar İskəndərov deyib. 

 

“Əvvəla, bu, hazırkı proseslərdə ilkin axtarışlar, ilkin istintaqa cəlb olunmalardır. Həm Azərbaycan, həm də digər tərəfdən marağı olan tərəflərin ilkin rəylər bildirmələri onların bu məsələdə maraqlı olduqlarını göstərir. Hələlik hansısa cinayət aktının olub-olmadığını istintaq qrupu araşdıracaq. Hansı hadisələrin necə baş verdiyi konkret müəyyənləşdiriləndən sonra ittiham irəli sürülməsi kimi digər hüquqi prosedur işləri görüləcək. Heç nə bilmədən, tələm-tələsik bəyanatların verilməsi indiki situasiyada doğru deyil. Bu, suveren ölkənin işlərinə kobud müdaxilədir. Azərbaycanda insan hüquqları qorunur. Bu mənada dövlət qarant rolunu oynayır. Dövlətin müvafiq orqanları dövlətin ictimai təhlükəsizliyinə və digər təhdidlərinə qarşı preventiv işlər görür, onlara qarşı mübarizə aparır. Heç bir səbəb olmadan hüquq mühafizə orqanlarımız tərəfindən belə addımlar atılmasına dair indəyədək hansısa nümunə yoxdur. Şübhələr, faktlar olmasa, müvafiq orqanlar heç vaxt bununla bağlı tədbir keçirməzlər. Nəticələri gözləməliyik. Hansısa qərarlar olacaqsa, bunu cəmiyyət də, “maraqlı qüvvələr” də biləcəklər. İndiki situasiyada kimlərinsə bundan təşvişə düşməsinə, narahat olmasına ehtiyac yoxdur. Azərbaycan dövləti öz vətəndaşının hüquqlarını qoruyur, lazımi addımları atır”, - deputat bildirib. 

PRAVDA.AZ

Xəbərlər