“Suyu istifadə edən adam oliqarxdır, ya adi vətəndaş, fərq eləmir, pulunu versin...”

Milli Məclisin deputatı Rüfət Quliyevin “avtomobil yuma yerlərində 100 % sayğac yoxdur, suyu elə buraxırlar ki, elə bil şəlalədir, bir-iki aydan sonra su qıtlığını hiss edəcəyik” fikirləri müzakirəyə səbəb olub. Bildirilir ki, deputat aşağı təbəqənin qazancını hədəf alıb, halbuki əsas su israfına məmur bağlarında, onların hektarlarla torpaq sahələrində yol verilir, nədənsə deputat bu məsələyə toxunmur, üstəlik qiymət artımına işarə edir.

 

R.Quliyev Pravda.az-a açıqlamasında səsləndirdiyi fikirlərə aydınlıq gətirib.

 

“Problem kimin nə qədər su istifadə etməsində deyil. Suyu istifadə edən adam oliqarxdır, ya adi vətəndaş, fərq eləmir, sayğacla istifadə etdiyi suyun pulunu versin. Problem budur ki, vəsaiti tam yığa bilmirlər. Yığsalar, yeni yaranan qurum da işlərini görə, müəyyən addımlar ata bilər. Təbii ki, suya ümumi qənaət etmək lazımdır. Amma pul ödəniləndə, istər imkanlı, istərsə də adi adam artıq hesabını biləcək. Pul ödəyəndə hiss edəcək ki, deməli, çox israfa yol verib. Bütün dünyada içməli su ilə əlaqədar problemlər artır. Buna nəzarət lazımdır. Sözümün məğzi bundan ibarətdir. Nəzarət, nəzarət, bir də nəzarət. Nəzarət olan yerdə sərfiyyat da azalacaq. Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasındakı çıxışımda sözümün əsl mənası bu idi ki, bu formada sərfiyyat olsa, vəsait yığılmasa, hər yerdə su sayğacı olmasa, onda suyun qiymətini saxlaya bilməyəcəyik. Hətta qiymətin qalxması da problemi həll etməyəcək. Çünki 50%-ə yaxın su sərfiyyatı ödəmə olmadan gedir”, - deputat bildirib.