Ümumi 29 Mart 2024, 15:21 | Baxış sayı: 31
"Adi küçələrdə parkinq qiymətləri dözünülməz dərəcədə bahadır"

"Parklama qiymətləri digər ərazilərə nisbətən mərkəzi yerlərdə bahadır. Belə başa düşürdüm ki, bahalığın da hansısa limiti var. Ötən gün şəhərdə 5 saat müşahidə apardım. Həqiqətən, adi küçələrdə dayanan maşınlar üçün qiymətlər dözünülməz dərəcədə çox bahadır. Buna görə də təklif edirəm ki, şəhərdəki tıxac problemini həll etmək istəyiriksə, şəhərdə ən az on-on iki yerdə bir neçə mərtəbəli yeni parklama yerləri tikilməlidir. Bunu xüsusi layihələrlə etmək olar. İnanıram ki, biznesmenlərimiz bununla maraqlanacaqlar. Layihə təqdim etsinlər, dörd, beş, altı mərtəbə parklama yeri tiksinlər. İnsanlar orada maşınlarını rahat saxlasınlar, qiymətlər tənzimlənsin. Küçədə əvvəl parklamanın saatı 1 manata qədər idisə, indi bu da qalxıb. Şəhərin küçəsidir, yer ayrılıb, orada maşın saxlanıla bilər. Bunun qiymətini qaldırmağa heç bir lüzum yox idi".

 

Bu sözləri açıqlamasında Milli Məclisin deputatı Rüfət Quliyev deyib.

 

Deputat təklif edib ki, səlahiyyətli qurum avtomobillərin hansı ərazilərdə sıxlıq təşkil etməsi barədə Bakıda proqramlı qaydada monitorinq keçirsin: "Beləliklə, həmin ərazilərdə parkinqlərin sayı artsın. Burada uduzmaq söhbəti olmayacaq. Xüsusi qurumlar kommersantları, biznesmenləri cəlb etsinlər, tender keçirsinlər. Dövlət özü də tikdirə, bundan qazana bilər. Nə qədər çox parkinq olsa, rəqabət də bir o qədər artacaq, qiymət də tənzimlənəcək. Məsələn, dəmiryol vağzalının qarşısında əvvəl 72 maşın saxlamaq üçün parkina var idi. İndi yığışdırıblar. Yaxşı, bu insanlar gəlib dostunu, qohum-əqrəbasını qarşılayanda maşını harada saxlasınlar? Həmin ərazidə də şərait yaradılmalıdır. Bu, çox vacib məsələdir. Şəhər artıq maşınların sayından boğulur və bu gün ən çox problem yaradan parkinqlərdir. Ucdantutma qiymətləri qaldırmaq doğru deyil".

pravda.az

Xəbərlər