Son 3 ildə plenar iclaslarda çıxış etməyən deputatlar
Meclis.info 2020-2022-ci illərdə keçirilən 118 plenar iclas boyunca parlamentdə çıxış etməyən deputatların siyahısını təqdim edir.
- Vasif Talıbov
Yeni Azərbaycan Partiyası İdarə Heyətinin üzvü və YAP Naxçıvan Muxtar Respublikası təşkilatının sədri olan Vasif Talıbov, 1995-ci ildən Naxçıvan Muxtar Respublikası Ali Məclisinin Sədridir.
“Meclis.info” nun apardığı statistik araşdırmalar zamanı belə məlum olub ki, 1 saylı Şərur-Sədərək seçki dairəsinin deputatı Vasif Talıbov 2005-ci ildən bəri Parlamentdə heç bir çıxış etməyib.
Araşdırmaya görə, 63 yaşlı deputat 1995-ci ildən bəri Milli Məclisin hər çağırışında seçicilərin səsini toplaya bilib. Öz dairəsində 38 093 nəfər rəsmi qeydiyyatlı seçiciyə sahib olan deputat son seçkidə 94,6% səs toplayıb.
Vasif Talıbov “Şöhrət” və “Şərəf” ordenləri ilə təltif edilib.
- Madər Musayev
10 saylı Binəqədi üçüncü seçki dairəsindən 6 dəfə ardıcıl, ümumilikdə 7 dəfə deputat seçilən Madər Musayev Milli Məclisin 2005-ci ildən təqdim etdiyi stenoqramlara əsasən Parlamentdə heç vaxt çıxış etməyib, daha əvvəl çıxış etməsi barədə isə heç bir informasiya yoxdur.1990-cı ildən Milli Məclisdə oturan 75 yaşlı deputatın seçicilərindən topladığı səs 63,9% olub.
- Ülvi Quliyev
15 saylı Yasamal birinci seçki dairəsinin deputatı Ülvi Quliyevin isə 56 yaşı var. O, 2020-2022-ci illərdə Parlamentdə keçirilən 118 iclasın heç birində iştirak etməyib. 61646 seçicinin 40,6 %-nin səsini toplayan deputat 2005-ci ildən bu vəzifədədir.
- Mixail Zabelin
34 saylı Xətai ikinci seçki dairəsinin deputatı Mixail Zabelin isə 1990-cı ildən bu vəzifədədir. Parlamentdə sonuncu dəfə 2017-ci ildə çıxış edən 76 yaşlı deputat 46380 seçici arasından 35,2% səs toplayıb.
- Oqtay Əsədov
45 saylı Abşeron seçki dairəsinin 68 yaşlı deputatı Oqtay Əsədov isə 2000-ci ildən deputatdır. O, ötən iki ilin 118 plenar iclasında heç bir çıxış etməyib. Deputat 117098 seçici arasından 67,7% səs toplayıb.
- Anatoliy Rafailov
2020-ci ildən 53 saylı Quba-Qusar seçki dairəsinin deputatı vəzifəsini yerinə yetirən Anatoliy Rafailovun isə 70 yaşı var. 59673 seçicidən 44,1 % səs toplayan millət vəkili deputat seçiləndən hələ də Parlamentdə çıxış etməyib.
- Ağalar Vəliyev
65 yaşlı Ağalar Vəliyev 97 saylı Goranboy-Ağdam-Tərtər seçki dairəsindən 68,1% səslə 2010-cu ildə deputat seçilib. O, sonuncu dəfə Milli Məclisdə 2019-cu ildə çıxış edib.
- Ülviyyə Ağayeva
2015-ci ildə 106 saylı Tovuz-Qazax-Ağstafa seçki dairəsindən deputat seçilən Ülviyyə Ağayevanın isə 44 yaşı var. 57343 seçicidən 54,2% səs toplayan depuutat son dəfə Milli Məclsidə 2016-cı ildə çıxış edib.
- İmamverdi İsmayılov
1995-ci ildən 125 saylı Zəngilan-Qubadlı seçki dairəsinin deputatı vəzifəsini yerinə yetirən İmamverdi İsmayılovun isə 64 yaşı var. 54749 seçici arasından 40 % səs toplayan deputat ötən 3 ildə keçirilən 118 plenar iclasda çıxış etməyib.
