“Qızılcanın qarşısını almaq üçün uşaqların bağçalara, ticarət mərkəzlərinə aparılmasına məhdudiyyət qoyulmalıdır”

“Azərbaycanda uşaqlar arasında qızılcaya yoluxma sayı kəskin artıb. Xəstəlik hazırda ayrı-ayrı rayonlarda geniş şəkildə yayılıb. Səhiyyənin qızılcaya qarşı gördüyü tədbirlər bəllidir. Lakin yoluxma səviyyəsi get-gedə artır. Bu, koronavirusla bağlı xəstəliklərdən biri də ola bilər. Dövlətimiz digər ölkələrdən fərqli olaraq hər zamankı kimi tez reaksiya verdi. Buna baxmayaraq, xəstəliyin qarşısını almaq bir az çətinləşib. Valideynlər də önləyici tədbirlər görməlidirlər. Məktəb və universitetlərin bağlanması təklif olunur, lakin təhsil müəssisələrinin qapadılması çox böyük məsələdir. Hələlik, yoluxmaların qarşısını almaq üçün uşaqların bağçalara, uşaq əyləncə mərkəzlərinə, iri ticarət mərkəzlərinə, ailəvi məkanlara aparılmasına məhdudiyyət qoyulmalıdır. Bu, daha doğru addım olar. Valideynlərlə yanaşı, həmin məkan sahibləri də bu məsələyə ciddi yanaşmalıdırlar”.

Bu sözləri açıqlamasında Milli Məclisin deputatı Cavanşir Paşazadə deyib.

“Qızılca əvvəllər də olub. Amma bu səviyyədə ağır müşahidə olunmamışdı. Görünür, hansısa virusdan qaynaqlanır. Kənd yerlərində o qədər də məsələyə ciddi yanaşmırlar. Fikir versəniz, yoluxmalar bölgələrdə daha çoxdur. Qızılcanın müalicəsi üçün nəzərdə tutulan dərmanlar şəhərlə yanaşı, rayonlarda, kəndlərdə də əlçatan olmalıdır. Nəzarət gücləndirilməli, qaydalara ciddi əməl edilməlidir”, - deputat bildirib.

pravda.az