"Qarşılıqlı münasibətlər xalqların xeyrinədir"
“Azərbaycan - Tacikistan münasibətləri tarixi köklərə, ənənələrə əsaslanır və son illər yüksələn xətt üzrə inkişaf edir. Dövlətimizin rəhbəri cənab İlham Əliyevin bu ölkəyə səfəri, səmimi şəkildə keçən görüşlər, imzalanan sənədlər, mətbuata verilən açıqlamalar bunu deməyə əsas verir”.
Pravda.az xəbər verir ki, bunu Milli Məclisin deputatı Tahir Rzayev deyib.
Deputat bildirib ki, səfər bir daha göstərdi, hər iki dövlət rəhbərinin arzuları, istəkləri üst - üstə düşür və bu bilavasitə əməkdaşlığın, dostluğun möhkəmləndirilməsinə və xalqların rifahının yaxşılaşdırılmasına, xoşbəxt gələcəyinə hesablanıb: “Tacikistan Prezidenti Emoməli Rəhmonun bəyanatında belə bir fikir ifadə edilmişdir ki, səmərəli və qarşılıqlı fəaliyyət mexanizmlərinin qurulması nəticəsində xalqlarımızın rifahına xidmət edən sanballı nəticələrin əldə edilməsinin əsası Azərbaycan xalqının görkəmli oğlu və mənim dostum, böyük yoldaşım Heydər Əliyev tərəfindən qoyulmuşdur və bu sıx, qarşılıqlı etimada əsaslanan əlaqələrə yeni vüsət verir və şərait yaradır. Görüşlər və çıxışlar zamanı parlamentlərarası əməkdaşlığın, mədəni, ticarət - iqtisadi əlaqələrin möhkəmləndirilməsinə, investisiyalar, sənaye kooperasiyası, kənd təsərrüfatı, nəqliyyat sahələrində və yanacaq - energetika kompleksində qarşılıqlı fəaliyyətin istiqamətlərinə önəm verilmiş, regional və beynəlxalq terrorizmə, ekstremizmə narkotiklərin və silahlarln qanunsuz dövriyyəsinə, transmilli mütəşəkkil cinayətkarlığa qarşı mübarizədə əməkdaşlığın möhkəmləndirilməsinin hər iki ölkənin milli maraqlarına uyğun olduğu bir daha ifadə edilib. Tacikistan Prezidentinə Ulu Öndərimiz Heydər Əliyevin xatirəsinə səmimi münasibətinə görə təşəkkürünü bildirən cənab İlham Əliyev danışıqların səmərəli aparıldığını, qarşılıqlı fəaliyyətlə bağlı konkret məsələlərin müzakirə olunduğunu, səfərin nəticələrinə əsasən ən yaxın vaxtda konkret addımların atılacağına əminliyini qeyd etmişdir. Dövlətimizin rəhbəri demişdir: “Fikrimcə, gələcəkdə də bu səfərlər daha intensiv olacaq, birlikdə işləyəcək, dostluq edəcək və birgə gələcəyimizi quracağıq””.
T.Rzayev əlavə edib ki, söylənilən bu fikirlər Azərbaycan - Tacikistan əməkdaşlığının, dostluğunun və qardaşlığının, sağlam münasibətlərinin sürətləndirilməsi üçün bir zəmanətdir və hər iki ölkənin vətəndaşlarının ürəyindəndir. Bu dövlətlərin inkişafına mühüm təkan verməklə əməkdaşlıqda mühüm mərhələdir.