"Pensiya yaşı çatanların bəziləri xahiş edirlər ki, yaş həddi artırılsın, digərləri də azaldılmasını istəyir..."

“Pensiya yaşı çatanlar arasında - dövlət qulluğu, orta məktəb, kollec, lisey, xəstəxanada həkim, tibb bacısı işləyənlərin hamısının xahişi budur ki, imkan varsa, pensiya yaşı artırılsın, 65 olmasın. Onlar deyirlər ki, biz 70 yaşa qədər işləyə bilərik. Bu, realdır. Mənə belə müraciətlər olub. Hətta bir neçə dəfə müraciət edəndə mən də müvafiq nazirliklərdən xahiş etmişəm ki, həmin şəxslərin fəaliyyət müddəti müqavilə əsasında 1 il – 2 il uzadılsın. Kim ki ağır fiziki işdə çalışır, yaxud başqa səbəblərdən pensiyaya ehtiyacı varsa, həmin insanlar isə pensiya yaşının azaldılması ilə bağlı müraciət edirlər. Yəni cəmiyyətin özündə də bu məsələdə ziddiyyət var…”

Bu sözləri Pravda.az-a açıqlamasında Milli Məclisin deputatı Rüfət Quliyev deyib.

Deputat bildirib ki, müvafiq nazirliklərin də bu məsələdə haqlı səbəbləri olur: “Müqavilə müddətinin uzadılması ilə bağlı Əmək və Əhalinin Sosial Müdafiəsi Nazirliyi, Səhiyyə Nazirliyi, Elm və Təhsil Nazirliyinə müraciət edəndə həmin nazirliklər haqlı olaraq bizə sual verirlər. Deyirlər ki, “Rüfət müəllim, siz tələb edirsiniz ki, gənc kadrlar – ali məktəb məzunları işlə təmin olunsunlar, bəs bunu necə edək? Məktəbdə, liseydə, xəstəxanalarda işləyənlərin sayı bəllidir. Yaşı çatanları pensiyaya çıxarmasaq, onların yerinə gənc kadrları götürə bilmirik”. Görürsünüz, burda da ziddiyyət var. Ona görə də demək olmaz ki, cəmiyyətdə pensiya yaşının azaldılması ilə bağlı birmənalı fikir mövcuddur. Oturub düşünmək lazımdır ki, bu məsələni başqa formada necə həll etmək olar? Hüquq-mühafizə orqanlarında da pensiya yaşına çatmış əsasən vəzifəsi olan şəxslərin artıq işləməyə maraqları var. Ona görə də pensiya yaşı barədə yeni bir model düşünməyə, bəlkə də, dəyər...”