“LGBT məsələsini insan hüquqları ilə əlaqələndirməyə çalışırlar...”
“Ümumiyyətlə, Azərbaycanda fəaliyyət göstərən səfirliklər hansı ölkədə fəaliyyət göstərdiklərindən asılı olaraq Azərbaycan reallıqlarını nəzərə almalıdırlar. Bu gün Azərbaycanda LGBT məsələsinə münasibət birmənalı deyil. Azərbaycanda fəaliyyət göstərən səfirliklər də bunu diqqətə almalıdırlar. Azərbaycan xalqı müsəlman xalqıdır, Azərbaycan müsəlman dövlətidir. Bizim öz ənənələrimiz, öz dəyərlər sistemimiz var və Qərb səfirlikləri də buna hörmətlə yanaşmağı bacarmalıdırlar. Necə ki biz Qərbin dəyərlərinə hörmətlə yanaşmağa çalışırıq”.
Bu sözləri Pravda.az-a Milli Məclisin İctimai birliklər və dini qurumlar komitəsinin üzvü Ceyhun Məmmədov “Landmark Hotel Baku”nun qarşısında Britaniya bayrağı ilə yanaşı LGBT bayrağının ucaldılmasından danışarkən deyib.
Deputat bildirib ki, son vaxtlar çox yanlış olaraq Qərbdə bu istiqamətdə geniş təbliğat aparılır: “LGBT-nin yayılması, insanların buna dəvət edilməsi heç də ürəkaçan bir şey deyil. Bu gün LGBT təkcə müsəlmanlar tərəfindən yox, eyni zamanda bütün səmavi dinlər tərəfindən xoş qarşılanmır. Belə bir addım nəinki müsəlmanlara, İslama, eyni zamanda Qərb mədəniyyətinin formalaşmasında rol oynayan xristian mədəiyyətinə, dəyərlərinə də ziddir. Bu proses ümumilikdə həm də ailə dəyərlərinə, onun formalaşmasına, daha da güclənməsinə öz mənfi təsirini göstərir. Görünən budur ki, Qərbin ayrı-ayrı qurumları, media strukturları, müxtəlif təşkilatlar, təəssüf ki, LGBT-nin təbliğatını aparırlar. Bu, çox yanlış və zərərli bir təbliğatdır. Əlbəttə, zaman-zaman insan hüquqlarının toxunulmazlığı da qabardılır. LGBT məsələsini daha çox insan hüquqları ilə əlaqələndirməyə çalışırlar. Hesab edirəm, bu da tam doğru və sağlam yanaşma deyil. Biz bütün hallarda, bütün cəmiyyətlərdə ailə institutunun, dəyərlərinin qorunmasına həssaslıqla yanaşmalı, bu dəyərləri qorumalıyıq. Çünki bütün dinlər bu dəyərlərin qorunmasına çağırış edir. İnsan hüquq və azadlıqları ilə bu məsələ birbaşa əlaqələndirilməməli, qarışdırılmamalıdır. Bunun özü əslində həm də yanlış təbliğat, yanaşma kimi qəbul edilməlidir”.