“Kim hesab edirsə, Yeni il müsəlman bayramı deyil, bu, onun şəxsi işidir…”

“Yeni il bayramının qeyd edilməsi məsələsinə yanaşmada bir neçə nüansı nəzərə almalıyıq. Sırf İslam nöqteyi-nəzərindən baxanda, İslamda iki bayram var – Ramazan və Qurban bayramları. Yeni il xristianlıqda qeyd olunan bayramdır. Bəli, bizim iki əsas dini bayramımız var. Ramazan və Qurban bayramları hər il Azərbaycanda yüksək səviyyədə qeyd olunur. Yeni il keçirmək isə hər kəsin öz şəxsi işidir. Biz dünyəvi dövlətik. Ölkəmiz dini qanunlarla idarə olunmur. Dünyəvi dövlət olduğumuz üçün ölkəmizdə həm müsəlman, həm xristian, həm də yəhudiliyə aid bayramlar qeyd olunur. Ona görə bu məsələdə bir-birimizin fikrinə hörmət etməyi, dözümlə yanaşmağı bacarmalıyıq...”

Bu sözləri Pravda.az-a açıqlamasında Milli Məclisin İctimai birliklər və dini qurumlar komitəsinin üzvü Ceyhun Məmmədov deyib.

Deputat bildirib ki, hər bir Azərbaycan vətəndaşı bu məsələdə qarşı tərəfə hörmətini göstərməlidir: “Bu gün Yeni il təkcə bizim ölkəmizdə yox, dünyanın hər yerində qeyd olunur. Yeni il artıq beynəlxalq bayrama çevrilib. Bunu insanların öz ixtiyarına buraxmaq lazımdır. Kim istəyirsə, qeyd etsin. Kim hesab edirsə, Yeni il müsəlman bayramı deyil, bu da onun şəxsi işidir. Burda ən önəmli, həssas məqam bir-birimizə hörmət etməyi bacarmağımız olmalıdır. Din Allahla bəndə arasındakı ünsiyyət vasitəsidir. Buna görə də bir-birimizə qarşı münasibətimizi qorumalıyıq. Cəmiyyətlər o zaman güclü olur ki, həmin cəmiyyətlərdə hər kəs bir-birinə, bir-birinin dininə, dini dəyərlərinə, bayramlarına hörmətlə yanaşmağı bacarır. Bizim də yanaşmamız belə olmalıdır...”