“İran Azərbaycan xalqına qarşı törədilmiş hərbi cinayətə şərik çıxdığını bir daha göstərib”

“Azərbaycan torpaqları 30 il ərzində işğal altında qaldığı müddətdə İranın səlahiyyətli şəxsləri bir dəfə də olsun Azərbaycan ərazilərini işğal edən, Xocalı soyqırımını törədən, onlarla Azərbaycan kəndlərində soyqırımlar törətmiş Ermənistanın bu hərəkətlərinə qarşı heç bir bəyanat qəbul etməyib, əksinə Ermənistanla diplomatik əlaqələri və hərbi əməkdaşlığı genişləndirib”.

“Report” xəbər verir ki, bu fikirləri Milli Məclisin deputatı Bəxtiyar Əliyev parlamentin aprelin 7-də keçirilən plenar iclasında çıxışı zamanı deyib.

Onun sözlərinə görə, bununla da İran Azərbaycan xalqına qarşı törədilmiş hərbi cinayətə şərik çıxdığını bir daha göstərib:

“Ona görə də İran parlamentinin bu ədalətsiz bəyanatını Azərbaycan xalqı, keçmiş məcburi köçkünlər, o cümlədən Ermənistandan qovulmuş qaçqınlar da qətiyyətlə pisləyir”.