“Azərbaycan-İtaliya əlaqələrinin genişləndirilməsi yalnız iki ölkənin maraqlarını deyil böyük bir regionun maraqlarını təmin edir”

“Bu gün Azərbaycan dünyanın enerji təhlükəsizliyinə verdiyi yeni töhfələrlə diqqət mərkəzindədir. Çünki hazırkı şəraitdə enerji təhlükəsizliyi məsələsi hər bir ölkə üçün mühüm əhəmiyyət kəsb edir və dünya ölkələrinin ildən - ilə enerjiyə olan tələbatları artır. Bu günlərdə Bakıda keçirilən Cənub Qaz Dəhlizi Məşvərət Şurası çərçivəsində nazirlərin 1- ci iclasının açılış mərasimində Azərbaycan Respublikasının Prezidenti cənab İlham Əliyev enerji sahəsində əməkdaşlığa dair dövlətimizin mövqeyini ortaya qoymuş və qeyd etmişdir ki, Azərbaycan Avropanın enerji təhlükəsizliyinin təmin edilməsində öhdəliklərinə sadiqdir və münasibətlərin, əməkdaşlığın möhkəmləndirilməsində maraqlıdır”.

 

Bunu Pravda.az-a Milli Məclisin deputatı Tahir Rzayev deyib.

 

Deputat bildirib ki, bu fikirlərin reallığını fevralın 13-də “Gülüstan” sarayında müstəqillik dövrünün 1280 MVt gücündə ən böyük istilik elektrik stansiyasının təməlqoyma mərasiminin keçirilməsi və orada Azərbaycanın ünvanına söylənilən xoş sözlər bir daha təsdiq edir: “İtaliya şirkətinin bu stansiyanın inşasında iştirakı Azərbaycan - İtaliya münasibətlərinin daha da möhkəmlənməsinə bir zəmanətdir və gələcək əməkdaşlığa yeni imkanlar yaradır. Əlaqələrin genişləndirilməsi yalnız iki ölkənin maraqlarını deyil böyük bir regionun maraqlarını təmin edir. Məlumdur ki, Azərbaycan neftinin böyük hissəsi İtaliya bazarına çatdırılmışdır. TAP layihəsi hər iki ölkə üçün mühüm əhəmiyyətlidir və dövlətlərin milli maraqlarına uyğundur. Digər tərəfdən Cənub Qaz Dəhlizi İtaliya üçün yeni imkanlar açır və bu ölkəyə qədər uzanan boru kəmərindən bir neçə ölkə faydalanacaqdır. Çıxışında Azərbaycan Prezidenti bildirmişdir ki, “Avropanın yeni ehtiyaclarını nəzərə alaraq və keçən il Avropa Komissiyası ilə Azərbaycan arasında imzalanmış sənədə əsasən biz Avropa məkanına təbii qazın həcminin artırılmasını təmin edəcəyik. Əlbəttə ki, burada TAP layihəsinin iki dəfəyədək genişləndirilməsi məsələsi gündəlikdədir””.            

 

“Göründüyü kimi ölkəmizin gücünə güc qataraq, enerji potensialını böyük dərəcədə artıracaq nəhəng layihə Azərbaycanın enerji təhlükəsizliyinə yeni töhfəsi olacaq və dövlətimizin beynəlxalq aləmdə nüfuzunun artması ilə bərabər, onun sürətlə inkişafına kömək edəcəkdir.      Hər bir yeni layihə Azərbaycanın uğurlarından və xalqımızın xoşbəxt gələcəyindən xəbər verir. Bu əlbəttə ki, xalqımızı sevindirir” - T.Rzayev əlavə edib.