“Azərbaycan Dövlət Su Ehtiyatları Agentliyinin yaradılması su tariflərinin artırılacağı demək deyil”

“Azərbaycan Dövlət Su Ehtiyatları Agentliyinin yaradılması su tariflərinin artrılacağı demək deyil. Burada məqsəd bir qayda olaraq inzibati idarəetməni təşkil etməkdir. Qiymətlə bağlı məsələ sonrakı dönəmlərdə proseslərin gedişatından asılı ola bilər. Hələ ki bahalaşma barəsində nəsə deyə bilmərik. Agentliyin yaradılmasında əsas məqsəd gələcəkdə suyun daha səmərəli istifadəsinə, su ilə bağlı problemlərin bir mərkəzdən həllinə nail olmaq, su ehtiyatları, su təsərrüfatı və meliorasiya sahələrində idarəetmənin təkmilləşdirilməkdir. Cənab Prezidentimiz Agentliyin yaradılması ilə bağlı fərman imzalamaqla çox düzgün addım atdı. Çünki bu sahədə fəaliyyət göstərən ayrı-ayrı təşkilatlar var idi. Bu qurumların pərakəndə şəkildə olması müəyyən qədər işləri ləngidirdi, iş getmirdi, problem yaranırdı”.

Bu sözləri  açıqlamasında Milli Məclisin Aqrar siyasət komitəsinin üzvü Cavanşir Paşazadə deyib.

“Dünyada qlobal istilər yaşanır, su ehtiyatları azalır və nəticədə yaranan problemlər Azərbaycandan da yan keçmir. Ölkəmizdə həm içməli suda, həm də kənd təsərrüfatı məhsullarının yetişdirləməsində problemlər var. Bildiyiniz kimi, bir neçə həftə öncə hörmətli Baş nazirin parlamentdə hesabatında da bu məsələ öz əksini tapdı. Bütün millət vəkilləri çıxışları zamanı su ilə bağlı problemləri qaldırdılar. Suyun ehtiyatla, gələcəkdə daha səmərəli istifadəsi üçün təkliflər verildi…”, - deputat bildirib.

Mənbə: pravda.az