Plenar iclaslar, Qanun Layihələri 1 Fevral 2022, 15:48 | Baxış sayı: 98
"Avtomobili saxlamağa yer yoxdursa, cərimələr niyə artırılır, vətəndaş nə etsin?”

“Bakıda 1 milyona qədər avtomobil var, ancaq şəhərdə parklanma yerlərinin sayı 20-30 min arasındadır. Bəs vətəndaş avtomobilini harada saxlasın? Avtomobili saxlamağa yer yoxdursa, cərimələr niyə artırılır, vətəndaş nə etsin?”

APA-nın məlumatına görə, bunu bu gün Milli Məclisin yaz sessiyası çərçivəsində keçirilən ilk plenar iclasında “Yol hərəkəti haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsinin birinci oxunuşda müzakirəsi zamanı deputat Fazil Mustafa bildirib.

Bu sahədə cərimələrin artırılmasının yolverilməz olduğunu vurğulayan F. Mustafa deyib ki, Bakıdan Şamaxıya qədər yollar sarı xətdir: “İndi necə edək, Bakıdan Şamaxıya qədər yolda avtomobili saxlamayaq? Cərimələrin artırılması ilə pis vəziyyətdə qalan vətəndaş olacaq. Azərbaycanda alternativ tramvay, trolleybus xətləri var? Burada siyasət dəyişməli və tamamilə yeni baxış ortaya qoyulmalıdır”.

Parlamentin Hüquq siyasəti və dövlət quruculuğu komitəsinin sədr müavini Qüdrət Həsənquliyev nəzərə çatdırıb ki, səkilərin yaxınlığında avtomobillərin saxlanılmasına görə 40 manat cərimənin tətbiqi ciddi problemlər yaradacaq: “İstanbulda qar yağdı, şəhər bir həftə iflic vəziyyətində qaldı. Bakıda qar yağsa, yol işarələri necə görünəcək? Yolların kənarında parklanmaya gəlincə, bəzi yerlərdə ciddi tədbirlər görülməlidir ki, piyadalara mane olmasın. Ancaq elə yerlər var ki, səki genişdir, avtomobil saxlananda piyadalara mane olmur. Bakıda cəmi 20 minə qədər parklanma yeri var. Mən komitədə qanun layihəsinin müzakirəsindən sonra çıxdım, Mətbuat prospektində yol kənarında yüzlərlə avtomobil saxlanmışdı. Bu qanun layihəsində bu məqamlarla bağlı ciddi düşünməli, tələsməməliyik. Bu qanun tək Bakı yox, bütün Azərbaycan üçün qəbul olunur".

Deputat belə maddələrin qəbulunu gələcəyə saxlamağı, indiki şəraitdə layihədən çıxarmağı təklif edib.

Deputat Fəzail Ağamalı da Bakıda parklanma sahəsində ciddi problem olduğunu vurğulayıb: “Yeganə həll yolu Bakıda uzunmüddətli parklanma yerlərinin yaradılmasıdır. Geniş meydanların, küçələrin altında da parklanma yerləri yaradıla bilər. Bunun şəhərsalma sisteminə daxil etməklə həll edə bilərik. Bakıda kanalizasiya və parklanma problemləri şəhər üçün iki ciddi problemdir, bunları sistemli həll etmək lazımdır. Heç bir cərimə, inzibati tədbirlərlə belə parklanmanın qarşısını ala bilməyəcəyik. Sürücü yolda düşüb kioskdan qəzet alanda avtomobilə cərimə gəlir. Bu, düzgün deyil. Bir dəqiqə, 5 dəqiqəyə saxlanmaya görə belə cərimələr yolverilməzdir. Xüsusən, təhsil müəssisələrinin qarşısında avtomobilin bir-iki dəqiqəyə görə saxlanılması ciddi narazılıq yaradır”.

Deputat Rüfət Quliyev 1 il əvvəl bu problemi qaldırdığını xatırladıb: “Bakı Nəqliyyat Agentliyinin konsepsiyası olmalıdır, konsepsiyası yoxdur, 5-6 nəfər şəhərə düşüb, avtomobilləri gah orada, gah burada çəkir, cərimələyir. Bəsti Bağırov küçəsində Bakı Nəqliyyat Agentliyi guya layihə həyata keçirir, 50-70 metr səki yaradıblar, o yalda 10-15 maşın saxlamaq olar. Nəyə lazımdır belə səki? Onu, bunu çəkməklə, cərimələməklə məsələ həll olunmur. O cərimə pulları hara gedir? Bakı Nəqliyyat Agentliyi məsələnin həlli üçün konsepsiya hazırlamalıdır. Yolu daraldır, istehkamlar qururlar, belə olmaz. Bakı Nəqliyyat Agentliyini tənqid edəndə də deyirlər ki, deputat niyə tənqid edir?!”

Xəbərlər