"Ərə getmək üçün qaçan 13 yaşlı qızın valideynləri də məsuliyyət daşıyır"

13 yaşlı məktəbli qızın evlənmək məqsədilə 40-dan çox yaşı olan Xudat şəhər sakini Səfər Kavazovla qaçması ictimaiyyətdə rezonans yaradıb. S.Kavazovun evli olması, ən böyük uşağının da elə qaçırdığı qızla eyni yaşda olması isə ayrı müzakirə mövzusudur. Cəmiyyət həyəcan təbili çalır. Bildirilir ki, aidiyyəti orqanlar bu sahədə ciddi maarifləndirici addımlar atmalıdırlar. Məsələyə fərqli aspektdən yanaşanlar isə vurğulayırlar ki, azyaşlı uşaqlar bəzi informasiyaları internetdən lazımından tez və çox alırlar. Təklif olunur ki, bunun qarşısını almaq üçün məktəblərdə, xüsusilə regiondakı təhsil ocaqlarında uşaq və yeniyetmələrlə, eyni zamanda onların ailələri ilə iş aparmaq lazımdır.

Milli Məclisin Ailə, qadın və uşaq məsələləri komitəsinin sədri, professor Hicran Hüseynova da Pravda.az-a açıqlamasında bildirib ki, bu kimi halların başvermə səbəbləri araşdırılmalıdır.

“Nə üçün uşaq təhsili, öz yaşıdları ilə ünsiyyəti, dostluğu deyil, ona  uyğun olmayan münasibətləri seçir? Nə üçün özünü inkişaf etdirməyə, bir sənət, peşə sahibi olmağa deyil,  təhsildən yayınmağa, aktiv sosial həyatdan uzaqlaşmağa, ailə qurmağa, digər cəlbedici həyat tərzinə daha çox meyillənir? Valideynlər onunla və əgər ailədə digər uşaqlar varsa, onlarla necə vaxt keçirir? Buna görə də ilk növbədə həmin azyaşlı qızla mütəxəssislər, xüsusi ilə də psixoloq işləməli, onun hazırkı vəziyyətini, düşüncələrini, maraqlarını, seçiminin səbəbini qiymətləndirməlidir. Valideynləri ilə də söhbətlər aparılmalıdır. Beləliklə, baş vermiş hadisənin həm motivi, həm də səbəbləri müəyyən edilməlidir. Əlbəttə, öz övladı yaşında uşağı qaçıran, ona qarşı heç bir  mənəviyyata, əxlaqa və qanuna sığmayan  hərəkətlər edən cinayətkar öz layiqli cəzasını almalıdır. Həmçinin  uşağın valideynləri də məsuliyyət daşıyır", - komitə sədri vurğulayıb.