“Quru sərhədlərimiz deyilən vaxtlarda açıq olsaydı, daha böyük fəlakətlərlə, faciələrlə üzləşə bilərdik…”

“Cənab Prezident İlham Əliyev belə bir ifadə işlətmişdi ki, mən nəyi nə vaxt və necə etmək lazım olduğunu yaxşı bilirəm. O vaxt vətəndaşlarımızın əksəriyyəti quru sərhədlərin bağlı olmasına narazılıq etmişdi ki, əhalimiz əziyyət çəkir, əlavə xərclər olur, sərhəddə ləngiyirlər, quru sərhədlər niyə bağlıdır və sair... Bu gün məlum olur ki, dövlətimizin başçısı, onun rəhbərliyi altında işləyən müvafiq qurumlar hər şeyi ölçüb-biçir, götür-qoy edir, araşdırırlar. Nəticə çıxarıb, qərara gəlirlər ki, nəyi etmək olar, nəyi yox. Deməli, quru sərhədlərimizin müəyyən dövlətlərlə bağlı saxlanılmasının çox vacib səbəbləri var imiş. Bax, bu gün hamısı üzə çıxır…”

Bu sözləri Pravda.az-a açıqlamasında Milli Məclisin deputatı Elman Məmmədov deyib.

“Məlum olur ki, ermənilərlə dostluq, Ermənistanla qardaşlıq edən Cənub qonşumuzla quru sərhədlərimiz deyilən vaxtlarda istənilən kimi açıq olsaydı, biz daha böyük fəlakətlərlə, faciələrlə üzləşə bilərdik. Hələ quru sərhədlərimiz bağlı olduğu halda Cənub qonşumuzdan bizə müxtəlif yollarla ötürülən narkotrafikin qarşısını almaqda çətinlik çəkirik. Sərhədlərimizdə nə qədər pozuculuq olur, sərhədçilərimizə atəş açanlar, ölkədə narkotikin tüğyan etməsi… Təbii ki, bunların hamısı Cənub qonşumuz tərəfindən bizə məqsədli şəkildə ötürülən bəlalardır. Buna görə də quru sərhədlərimizin bağlı saxlanılması lazım imiş”, - deputat vurğulayıb.