""Qisas" əməliyyatı ermənilər üçün sonuncu dərs olmalıdır"
"Azərbaycan Silahlı Qüvvələri uzun müddətdir, ermənilərdən Qarabağ ərazisində yerləşdirilmiş separatçıların, qanunsuz erməni silahlı birləşmələrinin çıxarılmasını tələb edirdi. Bununla bağlı dəfələrlə Azərbaycan tərəfinin mövqeyi səsləndirilib. Təəssüf ki, Ermənistan tərəfi bu tələblərə məhəl qoymur, hər vəchlə təxribat törədir, Azərbaycan ərazilərində üstünlük əldə etmək üçün qanunsuz fəaliyyətlər göstərirlər. Azərbaycan ərazilərində yeni minalar basdırırlar. Silahlı Qüvvələrimizə məxsus hərbçilərimizin şəhid olmasına, yaralanmasına səbəb olurlar. Hər dəfə Ordumuz Ermənistan təxribatlarının qarşısını məharətlə alıb, Ermənistana və onun qanunsuz silahlı birləşmələrinə, separatçılara öz yerini göstərib. Bu dəfə də bir yaralımıza cavab olaraq beş erməni qulduru məhv edildi. Separatçılar baş verən bu hadisədən doğru-düzgün nəticə çıxarmalıdır. "Qisas" əməliyyatı ermənilər üçün sonuncu dərs olmalıdır".
Bu sözləri açıqlamasında Milli Məclisin deputatı Naqif Həmzəyev deyib.
Deputatın sözlərinə görə, ermənilər anlamalıdırlar ki, Qarabağ ərazisində olan bütün qanunsuz silahlı dəstələr çıxarılmalıdır: "Onlar silahlarını yerə qoyaraq ərazilərimizi tərk etməlidirlər. Xatırlayırsınızsa, cənab Prezident Laçın rayonunda məskunlaşan keçmiş məcburi köçkünlərlə görüşü zamanı separatçılara xəbərdarlıq etdi. Separatçılarla, qanunsuz işlə məşğul olan şəxslərlə bağlı amnistiya şansını dilə gətirdi. Amma ermənilər bu şansı düzgün dəyərləndirmədilər, təxribatlarını davam etdirdilər. Qarşılığında Azərbaycan Silahlı Qüvvələrinin cavabı çox sərt oldu. Bu sərt mövqe davam edəcək. Ermənilər hər dəfə danışıqlar prosesini pozmağa cəhd etdiklərində, təxribat törətdiklərində aldıqları cavabın bundan sonra on qatını alacaqlar. Heç bir erməni quldurunun haqqı çatmır ki, əsgərlərimizə qarşı təxribat törətsin, hərbçilərimizi yaralasın, şəhid etsin. Ermənilərə hərtərəfli cavab verməyə hazırıq. "Qisas" əməliyyatı ilə öz mövqeyimizi ortaya qoyduq. Proseslərin bu cür davam edəcəyi təqdirdə daha böyük miqyasda anti-terror əməliyyatı həyata keçirilə bilər. Son erməni təxribatçısının torpaqlarımızı tərk edəcəyi günə qədər sərt tədbirlər görüləcək. Torpaqlarımız tamamilə quldurlardan təmizlənəcək".
Mənbə: Pravda.az