“Qarabağda təhlükəsizliyin tam təmin olunmadığı bir vəziyyətdə dəfn mərasiminin keçirilməsi müəyyən təhlükələrlə nəticələnə bilər”
“Dünyasını dəyişən doğmalarını öz dədə-baba yurdları olan Qarabağda dəfn etmək istəmələri insanların arzusudur. Bu arzuya etirazım yoxdur. Təbii, hər kəs istəyir ki, doğulduğu ata-baba yurdunda dəfn edilsin. Bu, onsuz da hamımızın gedəcəyi yoldur... Ancaq real vəziyyətlə də hesablaşmaq lazımdır. “Böyük Qayıdış” hələ davam edir. Artıq Laçına qayıdışın 3-cü mərhələsi oldu, 13 ailə də köçürüldü. Proses gedir. Düşünürəm, təhlükəsizlik məsələlərinə diqqət yetirmək lazımdır. Bu gün Qarabağdakı qəbiristanlıqların vəziyyəti necədir? Qəbiristianlıqların mina təhlükəsizliyi yoxlanılıbmı? Hazırda işğaldan azad olunmuş ərazilərimizdə dəfn mərasimləri keçirmək mümkündürmü? Yaxud belə düşünək: axı dəfn mərasimi bir-iki nəfərin iştirakı ilə olmur. Yaxın insanlar, qohum-əqrəba, el-oba dəfnə gəlir, böyük izdiham yaranır. Hazırda təhlükəsizliyin tam təmin olunmadığı bir vəziyyətdə o qədər insanın gedib-gəlməsi, dəfn mərasimi keçirilməsi müəyyən təhlükələrlə nəticələnə bilər”.
Bu sözləri açıqlamasında Milli Məclisin Müdafiə, təhlükəsizlik və korrupsiya komitəsinin üzvü Elman Məmmədov deyib.
Deputat xatırladıb ki, müharibə gedən ərəfədə ermənilər Tərtərdə dəfn zamanı qəbiristanlığı bombalamışdılar, nəticədə bir neçə nəfər həlak olmuşdu: “Dövlətimiz belə məsələlərin, gözlənilməz halların, bədbəxt hadisələrin qarşısını almaq üçün hələ ki bu məhdudiyyət tədbirlərini görür. Allah ötən gün Kəlbəcərdə dünyasını dəyişən jurnalist Zülfüqar Hüseynzadəyə rəhmət eləsin. Çox gözəl insan, yaxşı jurnalist idi. O, ürəyindəki arzusu ilə Başlıbelə getdi, orada da dünyasını dəyişdi. Təbii ki, insanların arzusuna qarşı getmək, onu pisləmək olmaz. Amma gərək diqqətlə düşünsünlər, təhlükəsizlik məsələləri önə çəkilməli, real vəziyyət nəzərə alınmalıdır. Cocuqmərcanlıya köçürmələr oldu. Əlbəttə, köçürmələrdən sonra orada dünyasını dəyişən insanlar elə oradaca dəfn olunurlar. Ağalı kəndinə də köçürmələr olub. Həyatdır, vaxtı gələndə dünyasını dəyişən insanlar olacaq. O insanları Ağalıdan aparıb başqa yerdə dəfn etməyəcəklər ki. Yer ayrılacaq, Ağalıda dəfn olunacaqlar. Laçına və başqa yerlərimizə qayıdışda da bu məsələ nəzərə alınacaq. Amma hələ ki bu məhdudiyyətlərlə razılaşmaq lazımdır”.
Mənbə: pravda.az