"Köçəryan-Sarkisyan və Rusiya hərbi-siyasi dairələrinin yeni ittifaqı ortaya çıxa bilər"
Nikol Paşinyanın son açıqlamasında Azərbaycanın ərazi bütövlüyünü yenidən şübhə altına alan fikirlər səsləndirməsi əslində o qədər də təəccüblü deyil.
Bunu açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Hikmət Babaoğlu bildirib.
Hikmət Babaoğlu deyib ki, 44 günlük müharibədən sonra kaputilyasiya aktına imza atan Ermənistanın ilk fürsətdə revanş cəhdləri edəcəyi aydın idi: “Müharibədən ötən 3 ilə yaxın müddətdə Paşinyan sülhlə bağlı mövqeyində yalnız müharibə bitdikdən dərhal sonra səmimi idi. Ona görə ki, Azərbaycanın Ordusunun gücü Paşinyanda və bütün Ermənistanda elə bir vahimə və isterika yaratmışdı ki, dərhal sülh sazişi imzalamaqla bu vəziyyətdən çıxacaqlarını düşünürdülər. Bu isterik vəziyyət 2021-ci ilə qədər davam etdi. Elə həmin dövrdə işçi qrupları, komissiyalar yaradıldı və s. Sonradan isə regiona xaricdən çoxsaylı müdaxilələr başladı və ermənilər sülhdən uzaqlaşmağa başladı, danışıqları imitasiya edərək vaxt qazanıb yenidən müharibəyə hazırlaşmaq niyyətinə düşdülər. İndi isə az qala yenidən müharibə vəziyyətinə yaxınlaşmaqdayıq. Ermənilər hesab edirlər ki, ötən müddət ərzində xeyli güclənə biliblər, ona görə də köhnə kartları yenidən oyuna daxil etməklə yeni 1988-ci il başlada bilərlər”.
Deputat qeyd edib ki, Qarabağda Köçəryan-Sarkisyan komandasının əlinin gücləndirilməsi də bununla əlaqədardır: “Ancaq axar sudan yalnız bir dəfə keçmək mümkündür. Çünki ikinci cəhdə qədər artıq su axıb getmiş olur. Zaman da elədir, onu geri qaytarmaq olmur. Ermənilər bir daha heç vaxt 1988-ci ilə qayıda bilməyəcəklər. Ancaq bu o demək deyil ki, buna cəhd də etməyəcəklər. Hazırda Paşinyanın həm Qərb, həm də Rusiya siyasəti iflasa uğramaqdadır. Dünən İtaliya mediasına verdiyi müsahibədə özü də bunu etiraf edir. Belə olan halda yenidən Köçəryan-Sarkisyan və Rusiya hərbi-siyasi dairələrinin yeni ittifaqı ortaya çıxa bilər. Bu, artıq Azərbaycan üçün ötən əsrin 90-cı illərində olduğu qədər təhlükəli olmasa da, ancaq hər halda xeyli mürəkkəb vəziyyət yarada bilər. Şübhəsiz ki, sadəcə sülhün hansı şərtlərlə əldə edilməsi baxımından bunu demək olar. Azərbaycanın öz ərazi bütövlüyünü qorumaq qüdrətində olduğu isə hazırda heç kəsdə şübhə doğurmur. Ona görə də əgər Arutunyanın getməsi ilə başlayan yeni mərhələ Paşinyanın da getməsi ilə nəticələnəcəksə, biz bu yeni ssenariyə hazır olmalıyıq. Çünki baş verənlər ermənilərin iradəsi ilə deyil, kənar müdaxilə, xüsusilə Rusiya hərbi-siyasi dairələrinin müdaxiləsilə baş verir. Ancaq bütün hallarda Azərbaycanın mövqeyi güclüdür və regionda yeni oyun qurmaq istəyənlər bu nəzərə almaq məcburiyyətindədirlər”.
APA