Plenar iclaslar 12 Oktyabr 2023, 16:03 | Baxış sayı: 164
"İlham Əliyevin 20 illik möhtəşəm marafonunda qazanılan zəfər tarixə həkk olunub"

"Prezident İlham Əliyevin 20 illik möhtəşəm marafonunda Vətən müharibəsi zamanı qazanılan zəfər böyük əhəmiyyətə malik olan hərbi-siyasi hadisə kimi Azərbaycan tarixinə həkk olunub".

Bunu Azərbaycan Milli Elmlər Akademiyasının prezidenti, Milli Məclisin deputatı, akademik İsa Həbibbəyli parlamentin oktyabrın 12-də keçirilən xüsusi iclasında çıxışı zamanı deyib.

Akademik bildirib ki, 44 günlük müharibə ilə xalqımız 30 illik işğal dövründən azad oldu, birgünlük antiterror tədbirləri ilə ölkəmiz tam suverenlik əldə etdi: “Bu, dövlət başçısı İlham Əliyevin xalq və dövlət qarşısındakı müqəddəs missiyasıdır. Azərbaycan xalqı xoşbəxtdir ki, onun lideri, ilk növbədə, həm doğma xalqı, həm də beynəlxalq ictimaiyyət tərəfindən XXI əsrin liderlərindən biri kimi qəbul edilir. Bu, bizim üçün böyük iftixardır”.

İ.Həbibbəyli vurğulayıb ki, dünyada inkişaf templərinə görə Azərbaycanla müqayisə ediləcək ölkələr barmaqla sayılacaq qədərdir: “Azərbaycanda bütün sahələr üzrə davamlı inkişaf gedir. Ölkəmizdə istər elm, istər təhsil, istər mədəniyyət və ziyalılıq İlham Əliyevin ölkəmizə rəhbərlik etdiyi 20 ildə özünəməxsus şərəfli yol keçib. Hesab edirəm ki, dövlət başçısının adı ilə bağlı olan bu 20 il 2023-cü il "Heydər Əliyev İli"nə ən böyük hesabatdır”.

Qeyd edək ki, parlamentin bugünkü xüsusi iclasında İlham Əliyevin Azərbaycan Prezidenti seçilməsinin 20-ci ildönümü ilə əlaqədar bəyanat qəbul ediləcək.

Xəbərlər