"Ermənistandan növbəti hərbi təxribat gözləmək mümkündür"
“Ermənistandan növbəti hərbi təxribat gözləmək mümkündür. Çünki Vətən Müharibəsindən sonra artıq iki dəfə irimiqyaslı hərbi təxribata imza atıb. Sonuncusu 12-14 sentyabr tarixlərində baş verdi. Müharibədən sonra bu, miqyas etibarilə ən böyüyü idi. İndi də Kütləvi İnformasiya Vasitələrində Ermənistanın yenidən silahlanmağa başlaması, Zəngəzura qoşun yığdığı barədə də məlumatlar var. Ermənistan siyasi və hərbi elitasının səsləndirdiyi fikirlərdən belə bir qənaət hasil olur ki, onlardan növbəti hərbi təxribat gözləmək mümkündür. Ermənistan bir yandan da özünün “sülhpərvər” obrazını beynəlxalq ictimaiyyətə sırımaq istəyir. Ancaq eyni zamanda Ermənistanın siyasi rəhbərliyi elə fikirlər səsləndirir ki, bütün bunlar yaratmaq istədiyi sülhpərvər obrazın üstündən tamamilə xətt çəkir”.
Bu sözləri Pravda.az-a açıqlamasında Milli Məclisin deputatı Elman Nəsirov deyib.
Deputat xatıarladıb ki, Ermənistanın Baş naziri Nikol Paşinyan gözlənilmədən Fransaya səfər etdi, Prezident Emmanuel Makronla görüş keçirdi: “Bu görüşdə yenə də Qarabağın “status”u ilə bağlı məsələni gündəmə gətirdi ki, bu məsələ həllini tapmayıb. Yenə də ATƏT-in Minsk Qrupunun bərpası ilə bağlı fikirlər səsləndirdi. Hətta bir az da irəli gedərək Ermənistan-Azərbaycan sərhədinə beynəlxalq misiyanın yerləşdirilməsi ilə bağlı fikir söylədi. Bu, tamamilə nonsesdir. Qarabağın “status”u ilə bağlı məsələ nonsesdir, ATƏT-in Minsk Qrupu ilə mövqe tamamilə blefdir, heç bir real əsaslara malik deyil. Sərhədə beynəlxalq misiyanın yerləşdirilməsi fikri isə heç bir tənqidə dözmür, bu, regionda formalaşmış geosiyasi vəziyyəti tamamilə kökündən dəyişmək anlamındadır. Yəqin ki, Paşinyan “beynəlxalq misiya” deyiləndə ABŞ və Fransanın sülhməramlı qüvvələrinin regiona daşınmasını nəzərdə tutur, mahiyyətcə bunu ifadə edir. Bu da qəbuledilməzdir. Ona görə də, Ermənistandan növbəti hərbi təxribatlar gözləmək mümkündür”.
E.Nəsirov əlavə edib: “Azərbaycan Silahlı Qüvvələrinin Müzəffər Ali Baş Komandanı birmənalı, qətiyyətli, prinsipial şəkildə bildirib ki, bizə qarşı hər hansı təxribat Ermənistan üçün çox ciddi nəticələrə gətirib çıxaracaq. Söhbət, təbii ki, “dəmir yumruq”dan, “dəmir yumruq”un Ermənistanın başında sınmasından, silahlı qüvvələrinin darmadağın edilməsindən, bel sütununu dağıtmaqdan gedir”.