“Bəxtiyar Hacıyevin həbsi məsələsi bəlli dairələrdə məqsədli şəkildə, həddindən artıq və yersiz formada ictimailəşdirilib”
“Ümumiyyətlə, hər hansı cinayət təqibinin gedişində seçilmiş həbs qətimkan tədbirinə ictimai formada münasibət bildirmək hüquqi cəhətdən doğru yanaşma deyil. Bu, cinayət prosesinə qanunsuz müdaxilədir. Məhkəmənin qətimkan tədbirinə dair qərarına yalnız hüququ olan şəxslər tərəfindən, hüquqi yollarla, daha yuxarı instansiyaya müraciət etməklə münasibət ifadə etmək olar. İndi ortada konkret əməlin törədilməsinə dair təqsirləndirmə var və ehtimal olunan əmələ münasibətdə cinayət təqibi başlanıb. Məqsəd də budur ki, cinayətin əlamətlərini əks etdirən əməllərin cinayət olub-olmadığı, cinayəti törətməkdə təqsirləndirilən şəxsin təqsirli olub-olmadığı müəyyən olunsun...”
Bu sözləri Pravda.az-a Milli Məclisin deputatı Bəhruz Məhərrəmov ictimai fəal Bəxtiyar Hacıyevin həbsinin siyasi sifariş olması barədə iddialara münasibət bildirərkən deyib.
Deputat vurğulayıb ki, qətimkan tədbiri cəza deyil və bu istiqamətdə manipulyasiyalar etməyə, məsələnin siyasiləşdirilməsinə heç bir ehtiyac yoxdur: “Heç bir vətəndaşın siyasi mənsubiyyəti, peşəsi onu cinayət məsuliyyətindən azad etmir. Hər kəs qanun qarşısında bərabərdir. İndiki cinayət işinə gəldikdə isə, ümumiyyətlə, həbs qətimkan tədbiri ona görə seçilir ki, cinayət işi üzrə icraatda şübhəli və ya təqsirləndirilən şəxsin mümkün qanunazidd davranışının qarşısı alınsın. Gördüyünüz kimi, Bəxtiyar Hacıyevin həbsi məsələsi də bəlli dairələrdə məqsədli şəkildə, həddindən artıq və yersiz formada ictimailəşdirilib. Bu yolla da istintaq fəaliyyətinə qanunsuz təsir cəhdləri müşahidə olunur. Bu, ictimai nəzarət yox, istintaqa açıq müdaxilə cəhdidir. Amma hər kəs başa düşsün ki, indi artıq məhkəmələrə, digər istintaq orqanlarına meydanlardan təzyiq dövrü deyil. Ümumiyyətlə, heç kim Azərbaycan hüquq mühafizə sistemini hədəfə ala bilməz. Biz Azərbaycan hüquq mühafizə orqanlarının peşəkarlığına inanır, hüququn aliliyi şəraitində bu cinayət təqibi ilə bağlı bütün halların hərtərəfli, tam və obyektiv araşdırılacağına, ədalətli qərar veriləcəyinə əminik…”