Siyasət 24 Fevral 2023, 15:19 | Baxış sayı: 152
“Bəxtiyar Hacıyev Azərbaycan dövlətinə, hakimiyyətinə çox yüksək dəyər verdiyini söyləsə…”

“Hansı ideologiyanı, siyasi mövqeyi, yaxud, sadəcə, siyasi xətt aparmasından asılı olmayaraq, heç bir Azərbaycan insanının, vətəndaşımızın ən son tədbir kimi canına qıymasını və ölüm aclığı aksiyası keçirməsini qəti şəkildə istəmirik. Ötən on illər ərzində Azərbaycan dövləti bu mövqeyə qarşı müxtəlif vəsitələrlə tədbirlərini həmişə əldə saxlayıb. Bütün münasibətlərin hüquqi çərçivədə müəyyənləşməsinin tərəfindəyik. Bəxtiyar Hacıyevin yetəri qədər vəkilləri var. Hətta qədərindən xeyli çoxdur. O cümlədən müxtəlif beynəlxalq platformalarda onun fəal şəkildə müdafiəsi aparılır. Həmin aksiyaların bir qismini, sadəcə, Azərbaycan dövlətinə, hakimiyyətinə qarşı olan qüvvələr keçirirlər. Hətta onları ad, konkret şəxsin personası, daşıdığı ideallar maraqlandırmır. Günün birində Bəxtiyar Hacıyev Azərbaycan dövlətinə, hakimiyyətinə çox yüksək dəyər verdiyini, dövlətin kursunun qələbəyə aparıb çıxaran tədbirlərinin uğurlu olduğunu söyləsə, həmin müdafiəçilərin müəyyən bir hissəsi onun arxasından çəkiləcəklər. Bu da bir reallıqdır”.

 

Bu sözləri Pravda.az-a açıqlamasında Milli Məclisin İnsan hüquqları komitəsinin sədri Zahid Oruc deyib.

 

Z.Oruc bildirib ki, Bəxtiyar Hacıyevi bəzən “Facebook” aktivi, bloqer, ictimai fəal kimi təqdim edirlər: “Düşünürəm ki, onun üzərinə qoyulan yük ağır olur. Məqsədli şəkildə bir neçə partiyanın yükünü ona yönəldirlər ki, o, müxtəlif qüvvələrlə, hökumət mənsubları ilə kəskin şəkildə toqquşsun və ona qarşı sərt tədbirlər görülsün. Müəyyən zamanlarda Bəxtiyar Hacıyev ABŞ-ın sabiq dövlət katibi və digər qüvvələr tərəfindən müdafiə olunduğundan, bununla bərabər, sanki onu mübarizənin önünə itələmək, əsas konfliktlərin nüvəsində saxlamaq istəyirlər. Aclıq, heç şübhəsiz ki, media məkanında, ictimai platformalarda, xüsusilə sosial şəbəkələrdə bu və ya digər formada, müxtəlif xarakterdə ciddi polemikalar doğurur. Əksər hallarda, aclıq aksiyasını kimin keçirməsindən asılı olmayaraq, ona qarşı bir humanizm baş qaldırır. Bu da anlaşılandır. İnsan hüquqları komitəsinin sədri kimi Şərq Tərəfdaşlığı üzrə milli platformanın təmsilçiləri, onun vəkil heyəti və digər şəxslərin çağırışlarını, müraciətlərini, o cümlədən elektron platformalar üzərindən mənə göndərdikləri, əksər hallarda dövlət başçısına və hörmətli Mehriban xanıma etdikləri çağırışların bir qismini almışam. Bunları müvafiq hökumət mənsublarına çatdırmağa çalışmışıq. Onsuz da ötürücü rol oynamağa ehtiyac yoxdur. Çünki əksər hallarda onlar buna çalışırlar”.

 

Komitə sədri deyib ki, Bəxtiyar Hacıyevin həyatına, fiziki sağlamlığına qarşı hər hansı bir təhlükə müxtəlif qüvvələrin əlində fürsət ola bilər: “Hazırkı regional və qlobal gündəlik, bir tərəfdən sülh prosesi, Vətən müharibəsində qələbəmizin diplomatik-siyasi meydanda rəsmiləşməsi üçün ciddi strateji siyasət həyata keçirən, o cümlədən Türkiyənin yaşadığı son fəlakət və onun ağır nəticələrinin aradan qaldırılması yönündə işlərə bağlı olduğu bir məqamda ölkənin bəlli bir gündəliyi, əsas hədəfləri, strateji kursu var. 2006-cı ildən bəlli olan fərdlər həmişə insan haqları mövzusunu iqtidar əleyhinə propaqanda alətinə döndərmək üçün bu gün Bəxtiyar bəy barədə geniş bir şəkildə informasiya dəstəyi verirlər. Konqres üzvlərindən tutmuş, Avropa Parlamentində özləri bir sıra hallarda korrupsiyaya bulaşmış şəxslər həmin xətt üzrə fəaliyyətlərini aparırlar.  Xankəndi-Laçın yolunda keçirilən aksiya ətrafında qaldırılan məlum ajiotaj, hər hansı əhali qrupunun guya “katastrofa”a məruz qalması ilə bağlı iddianı gücləndirmək üçün daxildəki məsələlərdən belə geniş faydalanırlar. Sinxronlaşma gedir, paralelləşmə, bir-biri ilə əlaqələnmə var. Çox istərdik ki, maye ilə qidalanma, bunun ardından quru aclığa keçmə barədə kənardan, xüsusilə Bəxtiyar bəyin vəkilləri vasitəsilə verilən mesajlar insani, humanist olsun. Kimisə təhrik etmək, mövqeyi dramatikləşdirmək üçün körükləmək, situasiyanı daha da gərginləşdirmək, hər kəsi öz hikkəsində qalmağa vadar etmək üzərində yox. Azərbaycan Prezidentinin liderliyi altında 50-dən artıq əfv sərəncamının, 10-a yaxın aministiya aktının şahidiyik. Hətta vətənə xəyanətdə günahlandırılan adamlar, bəlli simalar belə - onların adlarını çəkmək istəmirəm – Rəhim Qazıyev, Əlikram Hümbətov və başqaları əfv olunublar. Yəni dövlət o qədər güclüdür ki, kiminsə hansısa mikro mühitdə fəaliyyəti hakimiyyəti xüsusi olaraq narahat etmir. Amma söhbət bir şəxsdən gedir. Ülviyyə Alovlu Bəxtiyar bəy barədə məhkəməyə müraciət edib. Bu zəmində yaranmış situasiya belə cərəyan edir. Hər bir halda, Vətən müharibəsində qazanılmış qələbədən sonra Azərbaycan hakimiyyəti bütün münasibətlərini hüquqi müstəvidə inkişaf etdirməyə, vətəndaşların haqlarının daha geniş təminatına çalışır. Biz bu mövqedə olmalıyıq ki, hər kəs öz canını, varlığını qorusun. Düşünürəm ki, Bəxtiyar Hacıyevin valideynləri bu yöndə düzgün mesajlar verməlidirlər. Bundan sonra artıq məsələni məhkəmə səviyyəsində, digər vasitələrlə çözmək mümkündür. Ombudsman institutuna, digər təsisatlara müraciətlər var. Dövlətin humanizminin son situasiyada da qalib gələcəyinə heç şübhə etmirik”.

 

Z.Oruc Bəxtiyar Hacıyevin azadlığa buraxılması ilə başladılan kampaniyaya Milli Qəhrəman Polad Həşimovun anası Səmayə Həşimovanın da qoşulmasına münasibət bildirib: “Cəmiyyətin müxtəlif kəsimləri, xüsusilə Vətən müharibəsi şəhidlərinin ailələri üzvləri tərəfindən belə addımların atılması bütün hallarda qadağanedici deyil. Lakin çox istərdik ki, bu dairəni genişləndirmək əvəzinə, birinci növbədə aclıq aksiyasının dayandırılması daha düzgün olardı. Bəxtiyar bəyin vəkilləri, bildiyim qədərilə, 6-7 nəfərdir, hər birinin hakimiyyət mənsubları ilə, məhkəmə orqanları ilə görüşləri keçirilsin, məsələlərlə bağlı qarşı tərəflə də danışıqlar aparılsın, müraciətlər dövlətə düzgün çatdırılsın. Yoxsa ortada kimsə “gördünüz, iqtidarı geri çəkilməyə vadar etdilər, artıq bu, səmərə verir”, “öncə də kimlərsə eyni təzyiq alətlərini işə salırdılar, bu, yaxşı bir tutarqadır” desin ki, qeyri-siyasi, hazırkı münasibətlərə aid olmayan başqa məhbuslar, istintaq altında olanlar, mühakimə edilənlər də oxşar addımlar atsınlar. Bütün hallarda bir şeyi unutmaq lazım deyil ki, cənab Prezident qalib bir liderdir. Onun nüfuzu ən yüksək dövrünü yaşayır. Belə şəraitdə bizə daxildə əlavə mübarizə ocaqları yaratmaq lazım deyil. Azərbaycan hakimiyyəti enerjisini, ruhunu əsas planladığı məsələlərə fokuslayıb. Hakimiyyət qəti şəkildə belə bir şey arzulaya bilməz. Yəni dövlət adında bir fenomendən danışırıqsa, niyə bunu istəsin ki? Təəssüf ki, demokratiya, insan hüquqları belə amorf anlayışlara çevrilib və maksimum dərəcədə sağa-sola yönləndirilən bir alətdir. Bundan faydalanaraq Ukraynanın, Gürcüstanın, Yaxın Şərq ölkələrinin necə dağıdıldığını görmüşük. Biz əsla demokratik xətdən imtina etmirik. Amma elə bir siyasət aparılmalıdır ki, həqiqətən hamı ondan faydalana bilsin. Bəxtiyar bəyin hazırkı aclıq aksiyası ətrafda Azərbaycanı yeməyə hazır olan, ölkəni udmaq istəyən Qərb imperalizminin əlində alət olmamalıdır. Bunu obrazlı deyirəm. Çünki hansısa titullu şəxslərin, cəmiyyətdə nüfuzu olan şəhid valideynlərinin, Vətən müharibəsi iştirakçılarının bu prosesə qoşulması ilə məsələni genişləndirib, “baxın, görün, nə qədər elektoral bazaya malikdir” kimi mənzərə yaratmaq əvəzinə, daha sadə, səs-küysüz, kiminsə üzərindən kampaniya aparılmasına yol vermədən hər iki tərəfi qane edən formullar seçilməlidir. Düşünürəm, bu yöndə addım atmaq istəyən qüvvələr az deyil”.

Xəbərlər