Ümumi 5 Dekabr 2022, 16:11 | Baxış sayı: 63
“Bu, Gültəkin Hacıbəylinin növbəti şou yaratmaq cəhdidir”

“Milli Şuranın üzvü Gültəkin Hacıbəyli və ictimai fəal Leyla Arif arasında yaranmış məsələ, əlbəttə, məhkəmə predmetidir. Artıq məlumatlarda da qeyd olunur ki, bununla bağlı məhkəməyə müraciət olunub, hüquqi qaydada qiymət veriləcək. Bunun arxasında hər hansı siyasi məsələ dayanmır. Milli Şura və Gültəkin Hacıbəyli belə hallar olan kimi dərhal problemlərini hakimiyyətin üzərinə atmağa çalışırlar. Bu, onlarda artıq uzun illərdir formalaşmış bir xəstəlikdir - istənilən məsələni hakimiyyətin üzərinə atıb, bununla da hakimiyyəti qaralamağa cəhd edirlər, şər-böhtan kampaniyasını həyata keçirirlər”.

 

Bu sözləri Pravda.az-a açıqlamasında Milli Məclisin deputatı Cavid Osmanov deyib.

 

Deputatın sözlərinə görə, istər Gültəkin Hacıbəyli, istərsə də Milli Şuranın digər üzvləri başa düşürlər ki, cəmiyyət arasında onların heç bir elektoratı, nüfuzu yoxdur: “Sadəcə, öz aralarında bir-biriləri ilə görüntü üçün danışır, bir yerə toplaşırlar. Belə addımlar atmaqla çalışırlar, cəmiyyətdə fikir formalaşdırsınlar ki, guya bunların varlığı hakimiyyət üçün problem, cəmiyyət üçün dəyərlidir. Azərbaycan xalqı yaxşı başa düşür ki, onlar yalnız və yalnız anti-Azərbaycan dairələrə xidmət edirlər. Artıq cəmiyyət, xalq onları özündən tamamilə təcrid edib. Belə məsələləri hakimiyyətin üzərinə atmaqla cəmiyyətə çatdırmaq istəyirlər ki, guya gücləri var. Özləri də yaxşı başa düşürlər, bütün Azərbaycan xalqı görür ki, onlar cəmiyyətdən təcrid olunmuş, anti-milli dairələrə nökərlik edən qüvvələrdirlər…”

 

C.Osmanov vurğulayıb ki, Gültəkin Hacıbəyli və Leyla Arif arasında baş verənlərin hakimiyyətlə əlaqəsi yoxdur: “Bu, sadəcə, Milli Şura üzvlərinin uydurmasıdır. Azərbaycan hakimiyyəti hər hansı məsələdən təcrid olunmuş, anti-milli dairələrə xidmət edən belə qüvvələrə qarşı istifadə etmir. Tam əksinə, Azərbaycan demokratik prinsiplərə əsaslanan, inkişaf edən bir ölkədir. Bu gün Azərbaycanın və Azərbaycan hakimiyyətinin dünyada çox böyük nüfuzu, hörməti var. Belə xırda məsələlərlə, anti-milli qüvvələrin şər-böhtanı ilə məşğul olmağa Azərbaycan hakimiyyətinin nə marağı, nə də vaxtı var. Heç buna zəmin də yoxdur. Bu, fürsətdən istifadə edən Milli Şura üzvlərinin, Gültəkin Hacıbəylinin növbəti şou yaratmaq cəhdidir və digər atdıqları addımlar kimi bu da iflasa uğrayacaq”.

Xəbərlər