"“Azərsun”da yoxlamalar aparılmalıdır, inhisarçılıq var".

“Son 10 ildə Azərbaycanda şəkər tozuna olan tələbat 100% ödənilir. Əlavə olaraq ixrac da olunur. Ona görə də Azərbaycanda şəkər qıtlığı ilə bağlı deyilənlər hamısı yalandır. Təkcə bu sahə deyil, ümumiyyətlə, gündəlik tələbat malları, ərzaq mallarının qıtlığının yaranması digər mallarda olduğu kimi, inhisarçılıqla bağlıdır. Bütün sahələrdə inhisarçılıq höküm sürür. Orta və kiçik sahibkarlığa imkanlar yaradılmır. Təbii ki, inhisarçılıq olan yerdə bahalaşma da olacaq. Dəfələrlə bu məsələləri qaldırmışıq. Lakin inhisarçılığın aradan qaldırılması üçün səmərəli addımlar, təəssüf ki, atılmır. Bu sahədə də “Azərsun”un inhisarçılığı var. Hesab edirəm, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti “Azərsun”a baş çəkməlidir. Yoxlamalıdır ki, “Azərsun”un anbarlarında nə qədər mal var? Bəlkə bilərəkdən mağazalara şəkər tozu verilmir? Bütün bunlar aydınlaşdırılmalıdır”.

Bu sözləri Pravda.az-a Milli Məclisin deputatı Tahir Kərimli son günlər ölkədə yaranan şəkər qıtlığı barədə danışarkən deyib.

O bildirib ki, ölkədə inhisarçılığın yaranmasında müxalifət də günahkardır: “Avropada oturan Qənimət Zahid mənə yazır ki, guya Şirvan zonasında mürəbbə biznesi Tahir Kərimliyə tapşırılıb. Görün, nə qədər iyrənc məsələdir... Bunlar müxalifətdir. Öz də deyir ki, bu barədə mənə məlumat veriblər. Kim məlumat verib? Deməli, bu qıtlığı yaradanlar veriblər. Sən hardan məlumat almısan? Kimdir sənə məlumat verən? Kimdir Tahir Kərimlini namərdcəsinə ləkələmək istəyən? Bəli, Tahir Kərimli 1-2 ay İsmayıllıda olan zaman həyətinin məhsulundan ailəsi ilə birlikdə mürəbbə, turşu, tutma, bu kimi şeylər düzəldir, ailəsinə kömək edir. Bu nə deməkdir? Nə murdarlıqdır? Həmin Qənimət Zahidin videolarına minlərlə insan baxır, inanır, hətta başqaları da götürüb status paylaşırlar. Müxalifət də bu işdə günahkardır. Çünki onlar inhisarçılara kömək edirlər. Bu cür yalanlarla, xalqı yayındırmaqla...”