“Azərbaycanda FETÖ-nün kökünü kəsmək, təmizləmək üçün ciddi tədbirlər görülməlidir”
“Fətullah Gülən deyilən şeytan, yaramaz elə bir toxum səpib ki, FETÖ tək Türkiyədə yox, dünya miqyasında bir sıra ölkələrdə öz şəbəkələrini yarada bilib. Azərbaycanda da onların nümayəndələri yox deyil. Təbii ki, Türkiyədə də, başqa ölkələrdə də FETÖ ünsürləri hələ tam təmizlənməyib. Bununla bağlı müvafiq qurumlarımız lazımi tədbirlər görürlər. Bunların Azərbaycanda kökünü kəsmək, təmizləmək üçün daha ciddi tədbirlər görülməlidir. FETÖ-nün sızıntıları, tör-töküntüləri gizli qaydada da fəaliyyətlərini davam etdirirlər. Fürsət axtarırlar ki, yenidən güclənib, yenidən problemlər yaratsınlar. Təkcə hüquq-mühafizə orqanlarımızın nəzarəti ilə kifayətlənmək olmaz. Bu məsələdə vətəndaş cəmiyyətinin də mövqeyi çox vacibdir. Ümumxalq mübarizəsi, təhlükəli problem kimi heç kim FETÖ-yə qarşı öz ayıq-sayıqlığını itirməməlidir. Müəyyən məsələlər hiss olunanda müvafiq qurumlara onlar haqqında məlumatlar verilməlidir ki, tədbirlər görülsün”.
Bu sözləri açıqlamasında Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib.
Deputat media sektorunda, bəzi dövlət qurumlarında da FETÖ-çülərin olduğu, ölkə daxilində sabitliyi pozmağa güclərinin yetib-yetmədiyi barədə suallara isə belə cavab verib: “Hesab edirəm, sabitliyi pozmağa gücləri çatmaz. Amma yenə də təhlükə mənbəyidirlər. Ola bilər, FETÖ dövlət qurumlarında da, yüksək səviyyəli məmurlar arasında da təmsil olunur, kütləvi informasiya vasitələrində, hətta bütün qurumlarda nümayəndələri var. Ancaq güclənməmələri, mütəşəkkil fəaliyyət göstərməyə cəhd etməmələri üçün profilaktik tədbirlər görülməlidir ki, vaxtaşırı aşkarlanan kimi təcrid olunsunlar. FETÖ-nün bünövrəsi elə qoyulub ki, uzun illər bunların fəaliyyətləri, mərkəz Türkiyədə və bir sıra dövlətlərdə şəbəkələrinin yaradılması təhlükəli hal almışdı. Tədricən təmizlənə-təmizlənə gedir, amma qurtaran bəlaya oxşamır. Əgər FETÖ-çülərin fəaliyyətləri nəticəsində dövlətin, dövlətçiliyin təhlükəsizliyi məsələsi gündəmdədirsə, terror qruplaşması kimi bunlara qarşı mübarizə aparmaq lazımdr”.
pravda.az