Cəmiyyət 31 Mart 2022, 15:41 | Baxış sayı: 85
"4-5 saniyənin içərisində 400-dən çox mənzilin satışı həyata keçirilə bilməz".

“Mənzil İnşaatı Dövlət Agentliyinin (MİDA-red) bir neçə saniyə ərzində 442 mənzil satışını həyata keçirməsi həqiqətə uyğun deyil. MİDA bununla əlaqədar daha anlaşıqlı məlumat paylaşmalı, səbəbləri aydınlaşdırmalıdır. Texnologiya nə qədər böyük imkanlara malik olsa da, cəmi 4-5 saniyənin içərisində 400-dən çox mənzilin satışı həyata keçirilə bilməz. Heç olmasa, 20 dəqiqə, yarım saat vaxt aparsaydı, inandırıcı olardı”.

Bu barədə Pravda.az-a açıqlamasında Milli Məclisin deputatı Tahir Rzayev deyib.

Deputat qeyd edib ki, əhalinin mənzillə təminatı həssas məsələdir, ictimaiyyətin diqqətindədir: “Ona görə də məsələyə faktlarla aydınlıq gətirilməlidir. Belə şübhəli işlərə getmək olmaz. Bu gün dövlət aşkarlıqdan danışır, aşkarlığı təbliğ edir. Belə olan halda, hansısa təşkilat, şirkət və ya qurum aşkarlığı təmin etmirsə, sözsüz ki, ictimaiyyət arasında narazılıq yaranır. Hər kəs nəyin necə olduğunu yaxşı bilir. Biz niyə şübhə doğuracaq fəaliyyətlə məşğul olmalıyıq?! Yaxşı hal hesab etmirəm, anlaşılan deyil. Ona görə də ictimaiyyətin narazılığını doğru hesab edirəm. MİDA əsaslandırılmış informasiya yaymalıdır”.
 

 

Vahid Əhmədov: “Rəsmilər çıxsın, məsələyə aydınlıq gətirsin. Satış necə gedir, satış şəffaf olubmu, bu mənzillər kimə satılıb aydınlıq gətirsinlər. Bunlar açıqlanmalıdı. Bu onların şəxsi vəsaiti deyil, bu, dövlətin vəsait qoyduğu əmlaklardır”.

Deputat mənzillərin qiymətinin yüksək olmasından da bəhs edib:

“Mənə sosial evlərin qiymətlərinin qeyri-münasib olması ilə bağlı mütəmadi olaraq müraciətlər daxil olur. Özüm də dəfələrlə bu məsələni qaldırmışam. Bu evlərin adı sosial ev qoyulubsa, deməli qiymətlər güzəştli, əlçatan olmalıdır. Sosial evi hansısa maklerlər yox, ehtiyacı olan şəxslər almalıdır. Yenə deyirəm, sən əgər bunun adını sosial ev qoyursansa, qiymətlərdə güzəştlər olmalıdır. Bu məsələnin həlli mütləqdir”.

Xəbərlər