"Bu gün Ermənistan 1988-in sonu, 1990-ların əvvəllərindəki Azərbaycanı xatırlatmaqdadır"
“İlk gündən - 2020-ci ildən görürəm ki, Ermənistanda baş verən hadisələr, yazılan yazılar, verilən bəyanatlar, keçirilən mitinqlər, Qərbə və Rusiyaya yönəlik deyilmiş bəyanatlar, həqiqətən də, 1988-in sonu, 1990-ların əvvəllərindəki Azərbaycanı xatırlatmaqdadır. Hələ İkinci Qarabağ savaşı zamanı da Ermənistandan 90-cı illərin Azərbaycanı mənzərəsi olduğu deyilirdi. Doğrudan da hazırda Ermənistanda baş verən hadisələr, siyasi çəkişmələr, proseslər, bir-birinə qarşılıqlı ittihamlar, hakimiyyətsizlik, çarəsizlik, didişmə 1990-cı illərin Azərbaycanını göz önünüdə canlandırır. Bu gün Ermənistan 30 il geriyə siyasi addım atır. Elə bil ki, hər şey onlar üçün sıfırdan başlayıb. Təbii ki, bu, onların cəmiyyətinə, siyasi fəaliyyətlərinə, ümumilikdə ölkəyə mənfi yöndən çox ciddi təsir göstərəcək. İndi proses bu yöndə gedir. Ermənistanda vətəndaş müharibəsi də ola bilər, terror aktları da törədə bilərlər, ayrı-ayrı insanları sui-qəsdlərlə hədəfə də ala bilərlər. Bunların təzahürü görünür. Yeni insanlar ortaya çıxır. Hansı ki, bu selin qabağında gəlirlər və heç də Paşinyandan yaxşı olmayacaqlar, Ermənistanı daha da pisliyə sürükləyə bilərlər”.
Bu sözləri açıqlamasında Milli Məclisin İnsan hüquqları komitəsinin üzvü, Milli Cəbhə Partiyasının üzvü Razi Nurullayev deyib.
Deputat Ermənistanın Baş naziri Nikol Paşinyanın vəziyyətini isə belə şərh edib: “Paşinyan yenə düşünür ki, onsuz da başqa çarə yoxdur, Ermənistanı, erməniləri xilas etsin. Bəlkə də, Paşinyanın bu düşüncəsi doğru düşüncədir. O birilər isə revanşist hislərlə populizm üzərində çıxışlarını qururlar. Belə düşünürlər ki, Paşinyan getsə, onlar hakimiyyətə gəlsələr, o zaman Qarabağı qaytaracaqlar, dənizdən-dənizə Ermənistan yaradacaqlar, bütün dünya Ermənistanın ayağına barışa gələcək və sair... Bu cür mənasız iddialarla yaşayırlar. Təbii ki, hal-hazırda onların “kreslo” uğrunda davaları gedir. Hər kəs çox gözəl bilir ki, bundan sonra yaranan reallığı heç nə dəyişə bilməz. Ermənistan da, ordusu da Azərbaycandan on dəfələrlə zəifdir. Azərbaycan bunu əməli fəaliyyəti ilə göstərib. Bu gün populizmə söykənənlər, erməni xalqını öz günahı və iddiaları ucbatından düşdüyü vəziyyətdən daha pis vəziyyətə salaraq əziyyətləri üzərində varlanmaq, siyasi divident qazanmaq istəyənlər var”.
pravda.az