Siyasət 2 Dekabr 2022, 12:44 | Baxış sayı: 61
“Başqalarının qabağına kötük itələməkdənsə, öz yolunuzu gedin”

“DAK-dan çoxdan aralanmış və bir neçə ilini alternativ DAK yaratmağa sərf etmiş bir avropalı qonağımız bu günlərdə öz yeni xəyalpərəstliyi ilə mənə dedi: "Daha DAK- ın zamanı keçdi".  "Bizim vaxtımız keçdi!" desəydi başa düşərdim. Lakin Dünya Azərbaycanlıları Konqresinin vaxtı keçdi deməsi göztərir ki, Tanrının yazdığı yolu hələ də tapa bilməyib,  birləşmək və təşkilatlanmaq istəyimizə öz iddiaları ilə illər uzunu mane olmuş adamlar zərrə qadər  dəyişilməyiblər, elə əvvəlki cahilliklərini davam etdirir və başqa ad altında, başqa bir tərkibdə ortaya çıxmaq istəyirlər”.

 

Pravda.az-ın xəbərinə görə, bunu Milli Məclisin deputatı, Konqresin həmsədri Sabir Rüstəmxanlı bildirib.

 

“Bir ömür belələrinin "bitdi", "olmaz", "boş yerə uğraşma" xəbərlərinə qarşı durub yolumu getmişəm. Necə deyərlər, bunların dabbaqda gönlərinə bələdəm. İş görməkdənsə, iş görənlər haqqında söz gəzdirərlər... Mən Güney Azərbaycanın taleyi ilə bağlı ilk poemamı 20 yaşımda yazmışam. Sonrakı illərdə bir neçə kitab, 8 poema , onlarla şeir, saysız məqalə yazılıb, "Bakı-Təbriz" jurnalını nəşr etmişəm. DAK sədri oldum, olmadım, bu işi yenə davam etdirəcəm. Bunlar da bacardıqları işi görsünlər. DAK niyə bunların yuxusuna haram qatıb?   Ölkənin içindən və xaricdən müəyyən adamlar niyə İran siyasətinə qulbeçəlik edərək  illər uzunu DAK-a mane olur, onu parçalamağa, onu zəiflətməyə çalışırlar? Vaxtilə bu sifarişin hardan gəldiyini hər kəs bilirdi; lakin bu gün dövlətimizin mövqeyi aydındır və görülməli daha çox iş var... Xeyir, cənablar! DAK-ın vaxtı keçməyib, əksinə onun yeni tarixi başlanır! Hətta Bütöv Azərbaycan arzumuza qovuşandan sonra da Dünya Asərbaycanlıları Konqresinə, görüşlərə, sorunlarımızın bir yerdə müzakirəsinə ehtiyac qalacaqdır. Başqalarının qabağına kötük itələməkdənsə, öz yolunuzu gedin. Yoldan xəbəriniz varsa əgər!..”, - S.Rüstəmxanlı qeyd edib.

Xəbərlər