"Antiterror əməliyyatları çox peşəkarlıqla aparıldı və yalnız legitim hərbi hədəflər məhv edildi"
"Antiterror əməliyyatları çox peşəkarlıqla aparıldı və yalnız legitim hərbi hədəflər məhv edildi".
Bunu açıqlamasında Milli Məclisin deputatı Fatma Yıldırım deyib.
Onun sözlərinə görə, Ermənistan 30 illik işğalçılıq siyasəti dövründə humanitar qaydaları pozaraq bu yöndə bütün beynəlxalq konvensiyaları, prinsipləri tapdalayıb: "1992-ci ildə törədilmiş Xocalı soyqırımı, mülki insanların kütləvi qətliamı, işğal olunmuş ərazilərdə bütün mülki infrastrukturun dağıdılması, yaşayış məntəqələrinin yer üzündən silinməsi erməni vandalizminin bariz nümunələridir. 44 günlük Vətən müharibəsində də erməni tərəfi beynəlxalq humanitar hüququnu pozaraq döyüşlərin getdiyi ərazidən uzaqda yerləşən yaşayış məntəqələrinə hücum edərək 100-dən çox mülki insanı qətlə yetirib. Gəncə, Bərdə, Tərtər şəhərlərinə terror hücumu, eləcə də Mingəçevir şəhərinin, Xızı rayonunun raket hücumuna məruz qalması da deyilənləri təsdiqləyir”.
F.Yıldırım bildirib ki, Ermənistandan fərqli olaraq, Azərbaycan Birinci və İkinci Qarabağ müharibələrində, eləcə də 24 saatlıq antiterror tədbirləri zamanı bütün humanitar qaydalara əməl edib: "Məlumdur ki, sentyabrın 19-20-də Azərbaycan Ordusunun həyata keçirdiyi antiterror tədbirləri nəticəsində Qarabağdakı qanunsuz erməni hərbi birləşmələri təslim olmağa məcbur edildi. Cəmi bir sutka ərzində “ağ bayraq” qaldırıldı. Antiterror əməliyyatları çox peşəkarlıqla aparıldı və yalnız legitim hərbi hədəflər məhv edildi. Bu tədbir zamanı mülki əhali və obyektlər heç bir zərər görmədi. Bu, bir daha dövlətimizin humanizm siyasətinə sədaqətindən xəbər verən amillərdəndir".
Milli Məclisin üzvü vurğulayıb ki, antiterror əməliyyatları başlayan gün – sentyabrın 19-da Azərbaycan Müdafiə Nazirliyi Qarabağın erməni sakinlərinə müraciət edərək mülki əhalini hərbi obyektlərdən kənar durmağa və Ermənistan silahlı qüvvələrinin birləşmələrinə dəstək olmamağa çağırmışdı: "Bu barədə mobil SMS xidməti vasitəsilə Azərbaycanın Qarabağ bölgəsinin erməni sakinlərinə məlumat göndərilib. Eyni zamanda, səsgücləndirici texniki vasitələrlə əhali xəbərdar edilib və məlumat vərəqələri paylanılıb. Həmçinin qeyd olunmuşdu ki, qadınlar, uşaqlar, qocalar, habelə fiziki məhdudiyyətli şəxslər və xəstələrə lazımi tibbi və digər yardımlar göstəriləcək, onlar içməli su və ərzaqla təmin olunacaq. Belə də oldu. Bu faktlar humanizmin növbəti göstəricisidir. Bununla yanaşı, mülki erməni əhalisi üçün humanitar yardımlar da göstərilmişdi".
F.Yıldırım qeyd edib ki, antiterror əməliyyatlarından dərhal sonra bölgəyə humanitar yardımlar göndərildi. Bu yardımlara da ərzaq, qida məhsulları ilə yanaşı, həyati əhəmiyyət kəsb edən yanacaq məhsulları daxil idi: “Bəzi dairələr antiterror tədbirləri zamanı Azərbaycanı humanitar qaydaları pozmaqda ittiham etməyə cəhd göstərirlər. Amma nə Ermənistan, nə də Qərb ölkələri və təşkilatları Azərbaycanın ünvanına səslənən ittihamlarla bağlı bir fakt, sübut ortaya qoya bilmirlər. Əksinə, antiterror əməliyyatından sonra iki dəfə Qarabağda səfərdə olan BMT missiyası Azərbaycan tərəfindən bütün humanitar normalara əməl olunduğunu bəyan edib. Reallıqlar bundan ibarətdir”.
report.az