Siyasət 7 İyun 2023, 15:35 | Baxış sayı: 81
“Xüsusi xidmət orqanlarımız bu məsələ ilə çox ciddi məşğuldurlar”

“Milli Məclisin Regional məsələlər komitəsinin sədri hörmətli Siyavuş Novruzov ötən gün parlamentin plenar iclasında ayrı-ayrı ölkələrdə saytlar yaradılması, şirnikləşdirmək məqsədilə Azərbaycandakı hərbçilərinə müraciətlər edilməsi ilə bağlı məsələyə toxundu. Məndə belə bir məlumat yoxdur, lakin ola bilər, proses hazırda nəzarətə götürülüb, dayandırılıb. Müəyyən dövrlərdə Azərbaycandan xeyli insan, xüsusilə gənclərimiz - hətta onların arasında ailəlilər də çox olub, müxtəlif yollarla ayrı-ayrı dövlətlərin ərazisindən keçərək xaricə gediblər, xüsusi qruplaşmalara, silahlı birləşmələrə qoşulublar. İŞİD-in tərkibinə və digər başqa qanundankənar silahlı qruplaşmalara qoşulanlar olub. Bu məlumatlar hamıda var, mətbuatda da işıqlandırılıb. Onların əksəriyyətinin aqibəti məlumdur. Xüsusi dövlət orqanlarımız vaxtaşırı məlumatlar verirlər, mətbuat vasitəsilə xalqa çatdırılır ki, onlardan neçə nəfər öldürülüb, ailəsi, körpə uşaqları sahibsiz qalıb. Bu illər ərzində Azərbaycan dövləti o yollarla xaricə getmiş nə qədər ailələrin azyaşlı uşaqlarını gətirib dövlətin himayəsində saxlayıb, yaxud uşaqları qohum-əqrabasına təhvil verib. Bu yaxınlarda yenə üç qadın ölkəyə gətirildi...”

 

Bu sözləri Pravda.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib.

 

“Onların hamısı şirin vədlərə, cürbəcür əqidələrə, təriqətlərə uyub guya pul qazanmaq adı ilə xarici dövlətlərə gedib hərbi əməliyyatlarda iştirak ediblər, çoxunun aqibəti isə bəllidir. Çox güman ki, Siyavuş Novruzov belə məsələləri nəzərdə tutur. Təbii ki, xoşagəlməz haldır, qarşısı alınmalıdır. Hesab edirəm, bu məsələ ilə xüsusi xidmət orqanlarımız çox ciddi məşğuldurlar. Belə halların qarşısının alınması üçün tədbirlər görülür. Vətənpərvər oğlan silah götürüb öz vətəni uğrunda döyüşür. Vətənə sevgisini, vətənpərvərliyini sübut edir. Belə də etdilər. Birinci Qarabağ müharibəsində də, Vətən müharibəsində də, müharibələr arasındakı dövrdə də Azərbaycanın qəhrəman, igid, mərd, vətənsevər oğlanları örnək göstərdilər. Allah bütün şəhidlərimizə rəhmət eləsin”, - deputat bildirib.

Xəbərlər