“Xankəndindəki erməni Azərbaycanın vətəndaşlığını qəbul etmirsə, niyə kömək etməliyik ki?”

Xankəndində yaşayan erməni sakinin Azərbaycan Ordusunun postlarından birinə yaxınlaşaraq kömək istəməsi müzakirəyə səbəb olub. Erməniyə Azərbaycan hərbçiləri tərəfindən qayğı göstərilməsini dəstəkləyənlər az deyil. Təklif olunur ki, Azərbaycan Xankəndində yaşayan ermənilərə qənd, un, yağ və s.  kimi yardımlar etsin.

Milli Məclisin deputatı Elman Məmmədov isə Pravda.az-a açıqlamasında bu fikri dəstəkləmədiyini deyib.

“Mən belə düşünmürəm. Hesab edirəm, əvvəlcə separatçıların, cinayətkarların, terrorçuların, işğalçıların nəzarətində olan ərazimizi bu ünsürlərdən təmizləməliyik, orada qalan əhali isə qanunlarımıza tabe olub, vətəndaşlığımızı qəbul etməlidir. Yalnız bundan sonra biz onların bütün təminatları ilə ən yüksək səviyyədə məşğul olarıq. Bu gün isə yox. Necə ki Azərbaycanın başqa bölgələrindəki əhalinin hüquqları, təhlükəsizliyi müdafiə olunur, təminatı var, o cür də ermənilərə qarşı münasibət olacaq. Amma Xankəndindəki erməni bu gün mənim vətəndaşlığımı qəbul etməyibsə, mənim qanunlarımla yaşamırsa, hələ ki, həmin ərazidə Azərbaycan qanunları işləmirsə, biz ona niyə kömək etməliyik ki?”, - deputat bildirib.

Elman Məmmədov vaxtilə ermənilərlə azərbaycanlıların birgə dinc şəkildə yaşadıqlarını da xatırladıb: “Mülki erməninin polisimizə, hərbçimizə, dinc aksiya keçirən vətəndaşlarımıza yaxınlaşması və kömək istəməsi nədən xəbər verir? Xəbər verir ki, bu gün bizim ərazimizdə - Xankəndində, Xocalıda, Xocavənddə, Ağdərədə qalan dinc, siravi, mülki əhali çox pis vəziyyətdə yaşayır. Onlar indi yox, 30 ildən çoxdur ki, orada ağalıq edən separatçıların, cinayətkarların, terrorçuların, işğalçıların əsarəti altında yaşayırlar. Vaxtilə Köçəryanın, Sarkisyanın, Qukasyanın, nə bilim kimlərin, bu gün isə Araik Arutyunyan, Vardanyan və digərlərinin əsarəti altında yaşayırlar. Erməninin əlacsız qalıb, gəlib bizə əl açması çox şeylərdən xəbər verir. Qoy, o epizodlara tarix boyu erməniləri alət kimi istifadə edən, bu gün də müharibəyə səsləyən Makron kimilər baxsınlar. Makron ağılda olanlar nəticə çıxarsınlar. Bizim o erməniyə olan münasibətimizi görsünlər, oradakı hər bir vətəndaşımız erməniyə qarşı necə humanist, insanpərvər münasibət göstərdi. Erməni qayıdanda əllərinin ikisi ilə də təşəkkür, minnətdarlıq edir, öpüş göndərirdi. Düşünürəm, o erməni Xankəndinə qayıdandan sonra onu və ailəsini çox dəhşətli bir aqibət gözləyir. Çünki terrorçular, separatçılar amansız, qəddar, cinayətkardırlar. Bəlkə də, satqın, xəyanətkar damğası vurub, onu ailəsi ilə birlikdə məhv edəcəklər. Bu gün separatçıların əsarəti altında yaşayan minlərlə o cür erməni var. Təkcə bizim ərazimizdə yox, rus və digər əcnəbi kanallar Ermənistanda yaşayan dinc əhalini danışdırırlar. Çoxu deyir ki, 30 il əvvəl azərbaycanlılarla bir yerdə dinc yaşayırdıq, müharibə hər şeyi korladı. Artıq dilə gəlib, etiraf edirlər”.

Deputat hesab edir ki, imdad diləyən Xankəndində yaşayan erməniləri separatçıların əsarətindən azad etmək, onları qorumaq üçün Azərbaycan dövləti gecikmədən tədbir görməlidir: “Xankəndi, Xocalı, Xocavənd, Ağdərə tamamilə separatçılardan təmizlənməlidir, təmizlənəcək də. Necə ki 70 il ərzində və ondan əvvəl ermənilər azərbaycanlılarla birgə dinc yaşayırdı, yenə də yaxşı yaşayacaq. Sovet dövründə hələ 1988-ci ilə qədər ən yüksək səviyyədə yaşayış Bakıda və digər şəhərlərimizdə yaşayan ermənilərə aid idi. Ən yüksək səviyyədə dolanışıqla təmin olunurdular. Bu gün onların vəziyyəti nədir? Bunu kadrlardan hər birimiz görürük…”