"Vətəndaşın ümidi köhnə maşındır, onu da tut əlindən al, qadağa qoy, axı bu da doğru variant deyil"
Yaşı 20 ildən çox olan və istismar müddəti bitən avtomobillərin artıq texniki baxışdan keçirilməyəcəyi iddia olunur. Bu qərarı dəstəkləyənlər bildirirlər ki, Azərbaycanda avtomobil parkının yenilənməsinə ciddi ehtiyac var. Lakin qərar maddi vəziyyəti aşağı olan sürücülərin etirazına səbəb olub...
Məsələ ilə bağlı fikirlərini bölüşən Milli Məclisin Əmək və sosial siyasət komitəsinin üzvü Aqil Məmmədov deyib ki, 20-30 il bundan əvvəl istifadəyə buraxılmış maşınların şəhər daxilində hərəkəti müəyyən məhdudiyyətlər yaradır.
Deputat bildirib ki, bu baxımdan avtomobil parkının yenilənməsi, doğrudan da, lazımdır: “Amma vətəndaşlarımızın maddi vəziyyəti nəzərə alınmalıdır. Azərbaycan vətəndaşı olaraq hamımız istəyərik ki, hər kəs yeni avtomobillərdən istifadə etsin. Elə vətəndaşlarımız var, imkanı köhnə avtomobilə çatır. Bu, təbii haldır. Onlara qadağa qoymaq, müəyyən müddət təyin etmək, köhnə avtomobili əllərindən almaq düzgün olmaz. Belə sürücülərin vəziyyətini nəzərə alaraq dövlət tərəfindən köhnə avtomobillərin qiymətləndirilməsi aparılsa, yeni, sərfəli maşın ala bilmələri üçün uzunmüddətli kredit, güzəştli şərtlər qəbul olunarsa, sürücülər köhnə maşınlarını təhvil verib yeni minik avtomobili ilə təmin oluna bilərlər. Artıq bəzi yükdaşıyan avtomobillərin də istismar müddəri bitib. Güzəştli şərtlər daxilində məsələ həll olunsa, vətəndaşlarımız çətinlik çəkməzlər”.
A.Məmmədov deyib ki, istismar müddəti bitən avtomobillər şəhərdə tıxacın yaranmasına da səbəb olurlar: “Digər avtomobillərlə müqayisədə yaşı 20 ildən artıq olan avtomobillərin sürət həddi aşağıdır. Bəlli müddətə məsafəni qət edə bilmirlər. Nəticə vermədiyinə görə tıxaca səbəb olurlar. Bu gün xaricdən gələn qonaqların fikirləri də nəzərə alınmalıdır. Dəfələrlə Azərbaycanın necə dəyişib, inkişaf etdiyini, gözəlləşdiyini, şəhərdə xarici marka maşınların üstünlük təşkil etdiyini dəfələrlə vurğulayıblar. Şəhərin görüntüsünü də nəzərə alsaq, uzunmüddətli kredit şərtləri ilə köhnə avtomobillərin yenilənməsi mümkün olar. Vətəndaşın ümidi köhnə maşındır, onu da tut əlindən al, qadağa qoy, axı bu da doğru variant deyil”.
pravda.az