“Rusiyanın Azərbaycanda Baş konsulluğunun açılması anidən veriləcək qərar deyil”

“Azərbaycan milli maraqlar və beynəlxalq hüquqlar çərçivəsində bütün dövlətlərlə qarşılıqlı münasibətləri genişləndirməyə hazırdır. Rusiyanın Azərbaycanda Baş konsulluğunun açılması, təbii ki, anidən veriləcək qərar deyil. Hökumətlərarası komitələrdə geniş müzakirələr olunduqdan sonra yekun qərar qəbul oluna bilər. Rusiya dünyanın nəhəngləri sırasında olan ölkələrdəndir. Göründüyü kimi, Moskvanın zəifləməsi ilə bağlı verilən proqnozlar da özünü doğrultmadı. Hazırda beynəlxalq birliklər tərəfindən qonşu ölkəyə qarşı bir sıra sanksiyalar tətbiq olunması Rusiya iqtisadiyyatına o qədər də dağıdıcı təsir etmədi…”

Bu sözləri Pravda.az-a Milli Məclisin deputatı Müşfiq Cəfərov Rusiya Federasiya Şurasının sədri Valentina Matviyenkonun Azərbaycanda Rusiyanın Baş konsulluğunun açılması ilə bağlı təklifinə münasibət bildirərkən deyib.

Deputat vurğulayıb ki, Rusiya ilə Azərbaycanı çoxəsrlik dostluq ənənələri, ortaq tarix və mədəniyyət, bir-birinə qaynayıb qarışan milyonlarla insanın taleyi bağlayır: “Bu gün münasibətləri strateji tərəfdaşlıq səviyyəsinə çatdırmağa nail olunub. Azərbaycan Respublikası ilə Rusiya Federasiyası arasında diplomatik əlaqələrin qurulmasından indiyədək dostluq, əməkdaşlıq və təhlükəsizlik haqqında 200-dən çox ikitərəfli sənəd imzalanıb, münasibətlər daha da möhkəmləndirilib. İndi də iki ölkə arasında milli maraqlara cavab verən, beynəlxalq və regional təhlükəsizliyə xidmət edən qarşılıqlı əlaqələr mövcuddur. “Azərbaycan MDB ölkələri içində Rusiyanın əsas ticarət partnyorudur” desək, yanılmarıq…”