“Rusiya Ermənistanın ona yüklədiyi mənasız qoruyucu funksiyasından bu gün imtina etdi”
“Azərbaycan tarix boyu qonşu olduğu ölkələrlə dostluq və əməkdaşlıq münasibətlərini qoruyub saxlayır. Təbii ki, tarixin müəyyən dövrlərində dövlətimizin də qonşularımızla maraqlarının toqquşduğu ziddiyyətli anlar olub. Azərbaycan milli maraqlarını daim üstün tutan xarici siyasət həyata keçirir. Son zamanlar beynəlxalq aləmdə olan qütbləşmə siyasəti Ermənistan dövlətinə də təsir etdi. Ermənistan mövcudluğunu məhz ona vaxtilə arxa duran dövlətlərə borcludur. 30 il müddətində Azərbaycanın 20% torpaqlarını işğalda saxlamaq erməni hakimiyyətinin öz gücü, bacarığı deyildi. Burada ona ağalıq edən dövlətlərin rolu böyük idi. Lakin Azərbaycan dövləti bu 30 ildə bütün beynəlxalq aləmdə nüfuzunu artırdı, etibarlı tərəfdaşa çevrildi, hətta işğalı rəsmi təsdiqləyən beynəlxalq statuslu sənədlərin imzalanmasına da nail oldu. Ermənistan dövləti özü də bilirdi ki bu vəziyyət müvəqqətidir. Azərbaycan öz torpaqlarını azad etmək yolunda inamla irəliləyir. Dövlət başçımızın qurduğu əməkdaşlıq əlaqələri Cənubi Qafqazdakı əlverişli coğrafi mövqedən yararlanmağa çalışan partnyorların sayını günbəgün artırdı. Təbii ki, burada əsas vacib məqam Azərbaycanın ədalətli mövqeyinə dəstək vermək, beynəlxalq ictimaiyyət tərəfindən haqqı, ədaləti təmin etmək idi”.
Bu sözləri açıqlamasında Milli Məclisin deputatı Müşfiq Cəfərov deyib.
Deputat bildirib ki, Ermənistanla Rusiya arasında olan son gərginlik gözlənilən hal idi: “Çünki bu iki ölkə arasındakı münasibət qarşılıqlı tərəfdaşlıq deyil, birbaşa vassal asılılığı idi və Rusiya Ermənistanın ona yüklədiyi mənasız qoruyucu funksiyasından bu gün imtina etdi. Çünki Azərbaycan və onun lahiyələri, həmçinin tərəfdaşları daha vacib bir seçim idi. Mən buna ədalətin bərpası da deyə bilərəm. Ermənistan siyasətçiləri özləri etiraf edirlər ki, bugünkü mənzərə gözlənilən nəticə idi. Ötən əsrin 90-cı illəri Ermənistan Azərbaycandakı daxili çəkişmələrdən istifadə edib, torpaqlarımızı işğal etdi, xalqımıza soyqırımları və faciələr yaşatdı. İndi isə Azərbaycan Ermənistanın özünü ən güclü hesab etdiyi bir dövrdə ədaləti bərpa etdi. Ümid edirəm ki, erməni cəmiyyəti də bu düşmənçillik, ədavət mövqeyini unudub, bizə məxsus olan regionda sülhə sabitliyə tabe olacaq”.
pravda.az