“Ərdoğanın növbəti dəfə prezident seçilməsi üçün kifayət qədər imkan və şərait var”
“Azərbaycan-Türkiyə münasibətlərinin bu dərəcədə inkişafında, daha da güclənməsində, şübhəsiz ki, Türkiyə Prezidenti cənab Rəcəb Tayyib Ərdoğanın və cənab Prezident İlham Əliyevin çox böyük rolu var. İki lider arasındakı münasibətlər eyni zamanda ölkələrimiz arasındakı münasibətlərin də inkişafına bilavasitə təsir göstərir. Cənab Ərdoğan kifayət qədər güclü lider, Türkiyə tarixində böyük xidmətləri olmuş bir şəxsiyyətdir. Türkiyəni hazırda üzləşdiyi çətinliklərdən çıxara biləcək azsaylı şəxslərdən biri də məhz Ərdoğandır. Düşünmürəm ki, növbəti prezident seçkilərində Ərdoğan seçilməyəcək. “Ərdoğanın növbəti dəfə prezident seçilməməsi Azərbaycanın mövqelərinin zəifləməsinə gətirib çıxaracaq, hakimiyyətə mənfi təsir edəcək” kimi fikirlərlə razı deyiləm. Əvvəla, düşünürəm ki, Ərdoğanın növbəti dəfə prezident seçilməsi üçün kifayət qədər imkan və şərait var...”
Bu sözləri Pravda.az-a açıqlamasında Azərbaycan-Türkiyə parlamentlərarası əlaqələr üzrə işçi qrupunun üzvü Ceyhun Məmmədov deyib.
O bildirib ki, Rəcəb Tayyib Ərdoğanın yenidən Prezident seçilməsi Türkiyənin daha da güclənməsinə, inkişafına öz müsbət təsirini göstərəcək: “Ümumiyyətlə, Türkiyədəki prezident seçkilərinin Azərbaycanla əlaqələndirilməsinin tərəfdarı deyiləm. Necə ki Ərdoğan bugünkü Türkiyənin inkişafında böyük rol oynadı, Prezident İlham Əliyev də Azərbaycanın bu səviyyəyə gəlməsində müstəsna xidmətləri olan şəxsiyyətdir. Torpaqlarımızın azad olunması, ölkəmizin daha da güclənməsi üçün bütün addımlar atılır”.
C.Məmmədov “Türkiyədə yeni simanın prezident seçilməsi Azərbaycandakı müxalifəti hərəkətə gətirə bilərmi?” sualına isə belə cavab verib: “Hazırkı və yaxın gələcəkdəki proseslərdə müxalifətin böyük rol oynaması, ciddi təsirə malik olması hələ ki görünmür. Burada müxtəlif səbəblər var. Əlbəttə, bu məsələnin üzərində durmalıyıq ki, Azərbaycana dəstəyinə, hər zaman Azərbaycanın yanında olduğuna görə Azərbaycan xalqı da Rəcəb Tayyib Ərdoğanı dəstəkləyir, onun prezident seçilməsini arzulayır. Gələcəkdə hakimiyyətdə kimin olmasından asılı olmayaraq, Azərbaycan-Türkiyə əlaqələri strateji əlaqələrdir. Bu gün tarix bizdən bir yerdə olmağı, birgə hərəkət etməyi tələb edir. Biz də çalışmalıyıq ki, bu istiqamətdə hər zaman birliyimizi, həmrəyliyimizi qoruyaraq irəli addımlaya bilək”.