Cəmiyyət 5 İyul 2022, 14:50 | Baxış sayı: 170
"Nə qəbul olunmuş qanunlara məhəl qoyan var, nə xalqın, ictimaiyyətin etirazına..."

“Xəzər dənizinin hasarlanması Sumqayıtdan başlayıb Səngəçaladək davam edir. Bu, dünyanın heç yerində görünməyən, heç bir qayda-qanuna, əndazəyə sığmayan hərəkətdir. Bir gecəinin içində, 5-10 günün, 1 ayın içində olmayıb ki... Uzun illərdən bəri proses davam edir. Bu illər ərzində də ictimaiyyət , Milli Məclisin deputatları tərəfindən dəfələrlə məsələ qaldırılıb, qanunlar qəbul edilib ki, dənizdən nə qədər məsafədə, hansı ölçüdə tikili tikmək olar. Nə qəbul olunmuş qanunlara məhəl qoyan var, nə xalqın, ictimaiyyətin etirazına... Bir dəstə adam istədiyini edir. Dəniz Allah tərəfindən verilib, xalq, millət, hamı üçündür. Xalq dənizdən çimərlik, istirahət yeri kimi istifadə etməlidir. Kimin imkanı, pulu, səlahiyyəti varsa, gedib dənizi özbaşına hasarlayıb gediş-gəlişi, istifadəni məhdudlaşdırmalıdır? Təbii ki, bu, yolverilməzdir, qanun çərçivəsində çox ciddi tədbirlər görülməlidir”.

Bu sözləri Pravda.az-a açıqlamasında Milli Məclisi deputatı Elman Məmmədov deyib.

O qeyd edib ki, qanun varsa, icrası da olmalıdır: “Milli Məclis qanun qəbul edir, ancaq qanunun icraedicisi deyil. İcra orqanları, icra qurumları var. Onlar həmin qanunun əsasında fəaliyyət göstərməlidirlər. Kimlərinsə şəxsi maraqları naminə qanun pozulur. Azərbaycan ictimaiyyəti buna etirazını bildirir, ancaq məsələ təkcə Azərbaycan ictimaiyyəti ilə məhdudlaşmır. Abşerona, Bakıya çox sayda əcnəbi turistlər gəlir. Onlar hamısı Xəzərin sahilində baş verən qanunsuzluqları görür, müşahidə edirlər. Yəqin, onlar da özlərinə sual verirlər ki, görəsən, qanun buna niyə yol verir ki, Xəzərin sahili bir qrup adam tərəfindən hasarlanıb? Bunun qarşısı alınmalıdır”.

Xəbərlər