"Hesab edirəm ki, narkomaniya da pandemiya qədər təhlükəlidir”.
XXI əsrin ən böyük bəlalarından biri narkomaniyadır. Bu bəlaya mübtəla olan insanlar üçün son sığınacaq narkoloji mərkəzlər olur. Təəssüf ki, bəzən bu mərkəzlərə bağlanan ümidlər də puça çevrilir, narkotik aludəçisi əsla bu bəladan qurtula bilmir.
Bunu Pravda.az-a açıqlamasında Milli Məclisin deputatı Müşfiq Cəfərov bildirib.
Deputatın sözlərinə görə, demək olar ki, il ərzində hər bir təcrübəli narkotik istifadəçisi orta hesabla 4 nəfəri narkotikə cəlb edir, bunların da əksəriyyəti uşaq və gənclərdir: “Təəssüf ki, 2020-ci ildə narkotik istifadəsilə əlaqədar cəzaçəkmə müəssisəsinə üç mindən çox şəxs daxil olub. Onlar arasında 16-18 yaşlı gənclərimiz də var. Doğrudur, narkomaniya ilə mübarizə uzunmüddətli, çoxşaxəli, geniş maliyyə vəsaiti tələb edən bir prosesdir. Narkomaniyaya qarşı mübarizədə dövlət olaraq görüləcək ilk iş reabilitasiya mərkəzlərinin sayının artması olmalıdır. Həmçinin, müalicə müddətinin çox qısa çəkməsi də şəxslərin tam sağalmadan mərkəzləri tərk etməsinə gətirib çıxarır. Bunun başlıca səbəbi yerlərin məhdudluğudur. Digər mübarizə üsulu müalicə müddəti bitdikdən sonra mütəmadi olaraq keçmiş istifadəçilərlə konsultasiyaların aparılması və ən əsası onların işlə təmin olunmasında dövlət və cəmiyyət olaraq üzərimizə düşəni etməliyik. Onları həyata qaytarmalıyıq. Bakıda Respublika Narkoloji Mərkəzi fəaliyyət göstərir ki, 4 korpuslu mərkəzdə 300 çarpayı var. Əksər vaxtlar demək olar ki respublikadakı narkotik istifadəçiləri bu mərkəzdə müalicə alır. Çünki rayonlarda olan dispanserlərin vəziyyəti heç də ürək açan deyil, məhz bu səbəbdən ailələr şəraitin yaxşı olmasını nəzərə alaraq övladlarının Bakıda müalicə olmasına üstünlük verirlər. Məhz bu səbəbdən yer məhdudluğu yaranır və müalicə alan şəxslər xəstəxananı tez tərk edirlər. Düzdür, Lənkəran, Quba, Sumqayıtda da belə mərkəzlər fəaliyyət göstərsə də, qeyd etdiyim səbəblərdən camaatın əksəriyyəti müalicə üçün Bakıya üz tutur. Düşünürəm ki, bu, düzgün tendensiya deyil. Pandemiya dövründə modul tipli 10-dan çox xəstəxana inşa edilmişdir. Bu xəstəxanalarda çarpayıların sayı 4000-dən artıqdır. Yeni inşa olunan bu xəstəxanalara ayrılan vəsaitlər də böyükdür. Məhz pandemiyadan sonra bu xəstəxanaların bəzilərinin qeyd etdiyim təsnifat üzrə fəaliyyət göstərməsi bizim narkomaniya ilə mübarizəmizdə uğurlu addım olacaq. Həm ayrı bir vəsait ayrılmadan narkoloji dispanser əldə olunacaq, həm pandemiyadan sonra həmin xəstəxanalar fəaliyyətsiz qalmaqla ayrılan vəsait hədər getməyəcək. Hesab edirəm ki, narkomaniya da pandemiya qədər təhlükəlidir”.