Siyasət 27 Mart 2023, 12:59 | Baxış sayı: 117
"Ermənistanı dost hesab edən siyasətçilər İrəvanı sülhə təşviq etməlidir"

"Fransanın bəzi siyasətçilərinin Azərbaycanla bağlı qərəzli açıqlamaları davam etdirməsi Cənubi Qafqazda mövcud reallıqları adekvat qiymətləndirə bilmədiklərini göstərir. Bu cür açıqlamalar Fransanın regionda davamlı sülh və sabitliyin təmin olunmasında maraqlı olmadığını bir daha təsdiq edir".

Bunu APA-ya açıqlamasında Milli Məclisin Azərbaycan-Fransa parlamentlərarası əlaqələr üzrə işçi qrupunun rəhbəri Soltan Məmmədov deyib.

Soltan Məmmədov Fransa Senatının üzvü Valeri Buayenin hər zaman Azərbaycana qarşı qərəzli mövqe nümayiş etdirdiyini vurğulayıb. Bildirib ki, Azərbaycan öz suveren ərazisində beynəlxalq hüququn fundamental prinsiplərinə zidd istənilən fəaliyyətin qarşısını almaq hüququna malikdir.

Azərbaycan-Fransa parlamentlərarası əlaqələr üzrə işçi qrupunun rəhbəri qeyd edib ki, Laçın yolundan 2022-ci il dekabrın 12-dən bu günədək Rusiya sülhməramlılarına və Beynəlxalq Qırmızı Xaç Komitəsinə məxsus 5 minə yaxın nəqliyyat vasitəsi maneəsiz hərəkət edib: "Tibbi yardıma ehtiyacı olan şəxs və onları müşayiət edənlər bu yoldan sərbəst şəkildə istifadə edirlər. Bütün bunlar Laçın yolunda blokadanın olması ilə bağlı iddiaların tamamilə əsassız olduğunu göstərir. Lakin görünür Valeri Buaye və bəzi fransalı siyasətçilər bu faktı görmək istəmirlər. Azərbaycan heç vaxt heç bir xalqa qarşı soyqırımı həyata keçirməyib. Əksinə, dəfələrlə terrora və soyqırımı aktlarına məruz qalıb. Təəssüf ki, beynəlxalq ictimaiyyət Azərbaycan xalqının məruz qaldığı insanlıq əleyhinə cinayətlərə hələ də obyektiv qiymət verməyib. Bu, beynəlxalq münasibətlər sistemində ikili standartların hələ də bir çox hallarda həlledici rol oynadığına ən açıq sübutdur".

Deputat vurğulayıb ki, Valeri Buaye və onun kimi erməni lobbisinin təsiri altında olan bəzi siyasətçilər Azərbaycana qarşı əsassız ittihamlar irəli sürməklə ölkəmizə təzyiq göstərməyə çalışırlar. Lakin Azərbaycan dövlətinin öz təhlükəsizliyini və suverenliyini qorumaq üçün beynəlxalq hüququn imkan verdiyi bütün vasitələrdən istifadə etməsinə heç bir qüvvə mane ola bilməz: "Azərbaycan müharibədən qalib çıxmış və işğaldan uzun müddət əziyyət çəkmiş bir ölkə olaraq Cənubi Qafqazda sülhün təmin edilməsində hər kəsdən daha çox maraqlıdır. Məhz buna görə də Ermənistanla münasibətlərin normallaşması üçün ardıcıl səylər göstərir. Ermənistan bu fürsətdən istifadə etməli, sülhə nail olunması üçün üzərinə düşən öhdəlikləri yerinə yetirməlidir. Ermənistanı özünə dost hesab edən ölkələr və siyasətçilər də rəsmi İrəvanı sülhə təşviq etməli, münasibətlərin gərginləşməsinə çalışmamalıdır".

Xəbərlər