“Elm adamları, millət vəkilləri cənab Prezidentə Nobel Sülh mükafatının verilməsini istəyirlər”

Milli Məclisin deputatı Cavanşir Paşazadə Xalq yazıçısı Çingiz Abdullayevin "Nobel mükafatına aparan yolun dərsləri: mif, reallıqlar, uğurlar və çağırışlar" adlı konfransda Prezident İlham Əliyevin Nobel Sülh mükafatına namizəd kimi təqdim edilməsi barədə təklifinə münasibət bildirib.

C.Paşazadə açıqlamasında Xalq yazıçısının təklini müsbət dəyərləndirib: “Azərbaycan xalqı cənab Prezidentin yanındadır. Bu təklif də cənab Prezidentin gördüyü işlərdən, onun rəhbərliyi ilə torpaqlarımızın işğaldan azad edilməsidən, dünyada apardığı güclü xarici siyasətdən irəli gəlir. Çingiz müəllim doğru buyurur. Digər elm adamları da, millət vəkilləri də, Azərbaycan vətəndaşları da, təbii ki, cənab Prezidentə Nobel Sülh mükafatının verilməsini istəyirlər. Bu mükafat cənab İlham Əliyevə istər verilsin, istər verilməsin, o, onsuz da Azərbaycan xalqının yaddaşında, yüz illərlə, min illərlə qalacaq qəhrəman, liderdir. SSRİ dağılandan sonra Sovet hökumətinin apardığı siyasətin nəticəsi olaraq 15 ölkənin hər birində problemlər meydana çıxdı, sərhəd problemi ilə bərabər ölkələrin bir-biriləri ilə qarşılıqlı konfliktləri yarandı. Sovet hökuməti dağılsa da, bu konfliktlər hələ də qalıb. MDB ölkələri arasında yeganə dövlət Azərbaycandır ki, öz torpaqlarını işğaldan azad etdi, Sovet hökumətinin “miras qoyduğu” konflikti tam həll etdi. Bu qələbənin rəhbəri isə təbii ki, Ali Baş Komandan İlham Əliyevdir. Xarici ölkələrdə cənab Prezidentimizin çıxışlarına, apardığı davamlı, düzgün siyasətə, Azərbaycanda yaratdığı dayanıqlı iqtisadiyyata, hərbi gücə həsrətlə baxırlar. Mən də istərdim ki, mənim cənab Prezidentimə Nobel Sülh mükafatı verilsin, bu təklifi dəstəkləyirəm. Təbii ki, Cənab İlham Əliyev təkcə Nobel Sülh mükafatına yox, ən yüksək səviyyəli bütün mükafatlara layiqdir”.

pravda.az