“Bu, son demək deyil, çalışacağıq, daha da təzyiq göstərək…”

Azərbaycan-Ukrayna parlamentlərarası əlaqələr üzrə işçi qrupunun rəhbəri Rüfət Quliyev Ukrayna məhkəməsinin hökmü ilə Azərbaycan vətəndaşı, İkinci Qarabağ müharibəsi veteranı Misir Qasımlı və onun dostu Sübhan Quliyevin 8 il azadlıqdan məhrum edilməsinə münasibət bildirib.

R.Quliyev Pravda.az-a açıqlamasında deyib ki, bu məsələ ilə kifayət qədər məşğul olub.

“Ukrayna Ali Radasındakı kolleqalarımızla əlaqə saxlamışam, müraciət etmişəm. Amma məhkəmə prosesinə müdaxilə etmək, həqiqətən, çox çətindir. Təbii ki, bu məsələdə erməni “barmağı” hiss olunur. Çünki siyasi məqamlar daha çoxdur. Düşünürəm, bu, son demək deyil, mübarizə gedəcək. Bu gün Ukraynada müharibə davam etdiyi üçün mülki, cinayət tərkibli, yaxud başqa məsələlər Ukraynanın marağında deyil. Ukraynada bütün sistem tam müharibəyə köklənib. Bu da məsələyə birbaşa müdaxilə olunmasına maneə törədir. Milli Məclis, istər Ukraynadakı diasporumuz, Xarici İşlər Nazirliyi - hamısının marağı budur ki, Misir Qasımlı və Sübhan Quliyevin məsələsinə ədalətli baxılsın, ədalətli qiymət verilsin. Prosesin nəticəsi iki vətəndaşımızın da xeyrinə olmalıdır. Ukraynadakı səfirliyimizin də rolu bu məsələdə kifayət qədərdir. Addımlarımızı, köməyimizi əsirgəmirik. Çalışacağıq, daha da çox təzyiq göstərək. Təzyiq ancaq siyasi tərəfdən ola bilər. İstər Ukraynadakı deputatlar, istər siyasi-ictimai xadimlər, oradakı mediadan istifadə edib, təzyiq göstərmək olar. Məhkəmə sistemidir. Hamı başa düşməlidir ki, qarşı tərəfin gücü kifayət qədər çoxdur. Maraqlısı da budur ki, vətəndaşlarımızın məsələsinə niyə ədalətli baxış olmadı…”, - deputat bildirib.